Таҗикистандин хитайға қайтурулған уйғурлар һәққидә әрз сунулди

Голландийәниң дәнхаг (гаага) шәһридики бир түркүм адвокатлар 10-июн күни хәлқара җинайи ишлар сотиға әрз сунуп, хитай һөкүмитиниң чәт әлләрдики уйғурларға қарши җинайәтлирини тәкшүрүш үчүн мәхсус өмәк тәшкилләш лазимлиқини билдүрди. Мәлум болушичә, бу хәлқара адвокатлар гурупписиниң дәнхагдики хәлқара җинайи ишлар сотиға йоллиған уйғурлар һәққидики әң йеңи әрзи һесаблинидикән. 

Бирләшмә агентлиқниң 10-‍юндики хәвиридә ейтилишичә, хәлқара адвокатлар бу қетим бирләшмә баянат елан қилип: “таҗикистандики уйғурлар һуҗум нишаниға айлиниватиду. Ақивәттә улар тутқун қилинип, мәҗбурий һалда хитайға қайтуруп берилмәктә. Биздә буниң толуқ испатлири мәвҗут,” дегән. Шуниңдәк хитай һөкүмитиниң бивастә һалда таҗикистанниң ичкий ишлириға арилишиши әмәлийәттә хәлқара җинайи ишлар сотиниң тәкшүрүш даирисидики қилмиш икәнликини алаһидә әскәрткән. 

Хәвәрдә ейтилишичә, 2020-йили июлда улар бир қетим хәлқара җинайи ишлар сотиға әрз сунуп, миңлиған уйғурниң камбоджа вә таҗикистандин ирқий қирғинчилиқ давам қиливатқан уйғур дияриға мәҗбурий қайтурулуш мәсилисини тәкшүрүшни тәләп қилған икән. Әмма шу вақитта хәлқара җинайи ишлар соти “буни тәкшүрүшниң асаслири толуқ әмәс” дәп кечиктүргән икән. Хәлқара адвокатлар гурупписи бу һәқтә сөз қилип: “бу қетим тапшурған әрзимиздики дәлил-испатлар уйғурларниң таҗикистандин мәҗбурий йосунда хитайға өткүзүп бериливатқанлиқини толуқ испатлайду,” дегән.

Йеқинда лондонда ечилған “уйғур сот коллигийәси” ниң гуваһлиқ йиғинида хәлқаралиқ адвокатлар бирдәк “уйғурлар ирқий қирғинчилиққа учраватиду,” дәп көрсәткән иди.