Tajikistandin xitaygha qayturulghan Uyghurlar heqqide erz sunuldi

Gollandiyening denxag (ga'aga) shehridiki bir türküm adwokatlar 10-iyun küni xelq'ara jinayi ishlar sotigha erz sunup, xitay hökümitining chet ellerdiki Uyghurlargha qarshi jinayetlirini tekshürüsh üchün mexsus ömek teshkillesh lazimliqini bildürdi. Melum bolushiche, bu xelq'ara adwokatlar guruppisining denxagdiki xelq'ara jinayi ishlar sotigha yollighan Uyghurlar heqqidiki eng yéngi erzi hésablinidiken. 

Birleshme agéntliqning 10-‍yundiki xewiride éytilishiche, xelq'ara adwokatlar bu qétim birleshme bayanat élan qilip: “Tajikistandiki Uyghurlar hujum nishanigha ayliniwatidu. Aqiwette ular tutqun qilinip, mejburiy halda xitaygha qayturup bérilmekte. Bizde buning toluq ispatliri mewjut,” dégen. Shuningdek xitay hökümitining biwaste halda tajikistanning ichkiy ishlirigha arilishishi emeliyette xelq'ara jinayi ishlar sotining tekshürüsh da'irisidiki qilmish ikenlikini alahide eskertken. 

Xewerde éytilishiche, 2020-yili iyulda ular bir qétim xelq'ara jinayi ishlar sotigha erz sunup, minglighan Uyghurning kambodzha we tajikistandin irqiy qirghinchiliq dawam qiliwatqan Uyghur diyarigha mejburiy qayturulush mesilisini tekshürüshni telep qilghan iken. Emma shu waqitta xelq'ara jinayi ishlar soti “Buni tekshürüshning asasliri toluq emes” dep kéchiktürgen iken. Xelq'ara adwokatlar guruppisi bu heqte söz qilip: “Bu qétim tapshurghan erzimizdiki delil-ispatlar Uyghurlarning tajikistandin mejburiy yosunda xitaygha ötküzüp bériliwatqanliqini toluq ispatlaydu,” dégen.

Yéqinda londonda échilghan “Uyghur sot kolligiyesi” ning guwahliq yighinida xelq'araliq adwokatlar birdek “Uyghurlar irqiy qirghinchiliqqa uchrawatidu,” dep körsetken idi.