Қазақ паалийәтчиләр қазақистанниң икки қазақ сиясий панаһлиқ тилигүчини хитайға қайтурмаслиқини тәләп қилди

Мухбиримиз әркин
2019-12-09
Елхәт
Пикир
Share
Принт

Қазақистандики өктичи паалийәтчиләр қазақистан даирилириниң уйғур диярилиқ икки нәпәр қазақ сиясий панаһлиқ тилигүчини хитайға қайтуруп бериш қарариға қарши чиққан.

«Азадлиқ» радийосиниң хәвәр қилишичә, җанболат мамай, ерисбек тоқтасин, төләгән җукеф қатарлиқ паалийәтчиләр 9‏-декабир күни алмутада мухбирларни күтүвелип, қазақистан даирилириниң юқириқи икки қазақ сиясий панаһланғучини хитайға өткүзүп беришни тохтитиши керәкликини билдүргән.

Паалийәтчиләр, әгәр қазақистан мурағер алим оли, қастер мусахан оли исимлик бу икки сиясий панаһлиқ тилигүчини хитайға қайтуруп бәрсә, уларниң мутләқ тән җазасиға учрайдиғанлиқи яки өлтүрүлидиғанлиқини тәкитлигән. Илгири мурағер алим оли билән қастер мусахан оли алмутада ахбарат йиғини өткүзүп, өзлириниң хитай чеграсидин қанунсиз өтүп қазақистанға қечип чиққанлиқи, қазақистан һөкүмитидин сиясий панаһлиқ тәләп қилидиғанлиқини елан қилған. Нөвәттә, чеградин қанунсиз кириш билән әйиблинип тутуп турулуватқан мурағер алим оли билән қастер мусахан олиниң сиясий панаһлиқ илтимаси бу йил 10‏-айда қобул қилинған.

Лекин, өткән җүмә күни қазақистан дөләт бихәтәрлик комитетиниң муавин башлиқи дархан дилманоф, бу иккийләнниң хитайға қайтурулидиғанлиқини билдүргән. У, бу иккийләнниң қазақистанда «қелиш мумкинчилики йоқлуқи» ни илгири сүргәниди. «Азадлиқ» радийосиниң хәвиридә тәкитлишичә, өзлирини «қазақистан кәлгүси демократик партийәсиниң йетәкчилири» дә тонуштурған паалийәтчиләр «қазақистанниң пүтүн дунядики етник қазақларниң һоқуқини қоғдаш вәзиписи барлиқи» ни билдүргән.

Америка һөкүмити вә хәлқара кишилик һоқуқ тәшкилатлири башқа дөләтләрни уйғур аптоном райони тәвәликидики «һәрқандақ бир йәрлик милләт мусапирини хитайға қайтуруп бәрмәслик» кә чақирип, әгәр улар хитайға қайтуруп берилсә, «тән җазасиға учриши, қамаққа һөкүм қилиниши яки из-дерәксиз ғайиб болуши мумкинлики» ни агаһландуруп кәлгән.

Пикирләр (0)
Share
Толуқ бәт