Qazaq pa'aliyetchiler qazaqistanning ikki qazaq siyasiy panahliq tiligüchini xitaygha qayturmasliqini telep qildi

Muxbirimiz erkin
2019-12-09
Élxet
Pikir
Share
Print

Qazaqistandiki öktichi pa'aliyetchiler qazaqistan da'irilirining Uyghur diyariliq ikki neper qazaq siyasiy panahliq tiligüchini xitaygha qayturup bérish qararigha qarshi chiqqan.

"Azadliq" radiyosining xewer qilishiche, janbolat mamay, érisbék toqtasin, tölegen jukéf qatarliq pa'aliyetchiler 9‏-dékabir küni almutada muxbirlarni kütüwélip, qazaqistan da'irilirining yuqiriqi ikki qazaq siyasiy panahlan'ghuchini xitaygha ötküzüp bérishni toxtitishi kéreklikini bildürgen.

Pa'aliyetchiler, eger qazaqistan muraghér alim oli, qastér musaxan oli isimlik bu ikki siyasiy panahliq tiligüchini xitaygha qayturup berse, ularning mutleq ten jazasigha uchraydighanliqi yaki öltürülidighanliqini tekitligen. Ilgiri muraghér alim oli bilen qastér musaxan oli almutada axbarat yighini ötküzüp, özlirining xitay chégrasidin qanunsiz ötüp qazaqistan'gha qéchip chiqqanliqi, qazaqistan hökümitidin siyasiy panahliq telep qilidighanliqini élan qilghan. Nöwette, chégradin qanunsiz kirish bilen eyiblinip tutup turuluwatqan muraghér alim oli bilen qastér musaxan olining siyasiy panahliq iltimasi bu yil 10‏-ayda qobul qilin'ghan.

Lékin, ötken jüme küni qazaqistan dölet bixeterlik komitétining mu'awin bashliqi darxan dilmanof, bu ikkiylenning xitaygha qayturulidighanliqini bildürgen. U, bu ikkiylenning qazaqistanda "Qélish mumkinchiliki yoqluqi" ni ilgiri sürgenidi. "Azadliq" radiyosining xewiride tekitlishiche, özlirini "Qazaqistan kelgüsi démokratik partiyesining yétekchiliri" de tonushturghan pa'aliyetchiler "Qazaqistanning pütün dunyadiki étnik qazaqlarning hoquqini qoghdash wezipisi barliqi" ni bildürgen.

Amérika hökümiti we xelq'ara kishilik hoquq teshkilatliri bashqa döletlerni Uyghur aptonom rayoni tewelikidiki "Herqandaq bir yerlik millet musapirini xitaygha qayturup bermeslik" ke chaqirip, eger ular xitaygha qayturup bérilse, "Ten jazasigha uchrishi, qamaqqa höküm qilinishi yaki iz-déreksiz ghayib bolushi mumkinliki" ni agahlandurup kelgen.

Toluq bet