Қазақистанда 3 сақчи билән 1 пуқра қораллиқ бир һуҗумчи тәрипидин етип өлтүрүлгән

Мухбиримиз қутлан
2016-07-18
Share

Б б с ниң хәвиригә қариғанда, бүгүн, йәни 18-июл күни қазақистанниң алмута шәһиридә қораллиқ һуҗум қилиш вәқәси йүз берип, 3 нәпәр сақчи билән бир пуқра етип өлтүрүлгән.

Қазақистан президенти нурсултан нәзәрбайеф бу һәқтә баянат елан қилип, мәзкур һуҗум вәқәсини «қораллиқ ислами күчләр кәлтүрүп чиқарған террорлуқ һәрикити икәнликини, қазақистанда террор тәһдитлириниң дәриҗисиниң күнсайин ешиватқанлиқи» ни билдүргән.

Қазақистан ички ишлар министирлиқиниң билдүрүшичә, бу қетимлиқ қораллиқ һуҗум вәқәсигә четишлиқ 27 яшлиқ гумандар руслан аписбайевич қулуқбайеф қолға елинған. Мәзкур вәқәгә четишлиқ башқа гумандарлар давамлиқ тәкшүрүлмәктикән.

Ройтерс агентлиқиниң билдүрүшичә, вәқәдә өлгәнләрниң сани давамлиқ көпийип 6 нәпәргә йәткәнлики пәрәз қилинмақтикән.

Игилинишичә, һуҗумчилар алмута шәһириниң сода райониға җайлашқан бир сақчиханиға һуҗум қилип 3 сақчини етип өлтүргәндин кейин, йәнә бир йәрлик кишини етип өлтүрүп, униң машинисини булап қачқан. Қазақистан даирилири һуҗумда йәнә икки сақчиниң яриланғанлиқини, тирик тутулған қораллиқ һуҗумчиниң қатиллиқ җинайити билән тутуш буйруқи чиқирилған киши икәнликини илгири сүргән.

Мәлум болушичә, өткән айда техи бир гуруппа қораллиқ һуҗумчилар қазақистанниң ақтөбә шәһиридики бир қорал дукини билән һәрбий базиға һуҗум қилип 7 кишини өлтүргән болуп, қораллиқ тоқунуш давамида сақчилар әң аз болғанда 18 нәпәр һуҗумчини етип өлтүрүп вәқәни тинҗитқан иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.