Qazaqistanda 3 saqchi bilen 1 puqra qoralliq bir hujumchi teripidin étip öltürülgen

Muxbirimiz qutlan
2016-07-18
Share

B b s ning xewirige qarighanda, bügün, yeni 18-iyul küni qazaqistanning almuta shehiride qoralliq hujum qilish weqesi yüz bérip, 3 neper saqchi bilen bir puqra étip öltürülgen.

Qazaqistan prézidénti nursultan nezerbayéf bu heqte bayanat élan qilip, mezkur hujum weqesini "Qoralliq islami küchler keltürüp chiqarghan térrorluq herikiti ikenlikini, qazaqistanda térror tehditlirining derijisining künsayin éshiwatqanliqi" ni bildürgen.

Qazaqistan ichki ishlar ministirliqining bildürüshiche, bu qétimliq qoralliq hujum weqesige chétishliq 27 yashliq gumandar ruslan apisbayéwich quluqbayéf qolgha élin'ghan. Mezkur weqege chétishliq bashqa gumandarlar dawamliq tekshürülmektiken.

Roytérs agéntliqining bildürüshiche, weqede ölgenlerning sani dawamliq köpiyip 6 neperge yetkenliki perez qilinmaqtiken.

Igilinishiche, hujumchilar almuta shehirining soda rayonigha jaylashqan bir saqchixanigha hujum qilip 3 saqchini étip öltürgendin kéyin, yene bir yerlik kishini étip öltürüp, uning mashinisini bulap qachqan. Qazaqistan da'iriliri hujumda yene ikki saqchining yarilan'ghanliqini, tirik tutulghan qoralliq hujumchining qatilliq jinayiti bilen tutush buyruqi chiqirilghan kishi ikenlikini ilgiri sürgen.

Melum bolushiche, ötken ayda téxi bir guruppa qoralliq hujumchilar qazaqistanning aqtöbe shehiridiki bir qoral dukini bilen herbiy bazigha hujum qilip 7 kishini öltürgen bolup, qoralliq toqunush dawamida saqchilar eng az bolghanda 18 neper hujumchini étip öltürüp weqeni tinjitqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet