Quddus ghojamyarof tewellutining 100 yilliqi xatirilinishke bashlidi

Muxbirimiz ümidwar
2018-01-14
Élxet
Pikir
Share
Print

Uyghur zamaniwi muzika sen'itining asaschisi, Uyghurlarning tunji we bir qanchilighan simfoniyelirining aptori quddus ghojamyarof tughulghanliqining 100 yilliqi qazaqistan qatarliq ottura asiya elliri ziyaliyliri arisida xatirilinishke bashlighan.

Qazaqistandiki "Uyghur awazi" géziti yazghuchi awut mesimofning quddus ghojamyarof tewellutining 00 yilliqigha béghishlighan mexsus maqalisini élan qildi.

1918-Yili 21-may küni almuta yénidiki qeynezer yézisida tughulghan quddus ghojamyarof sabiq sowét ittipaqi da'irisidin halqip Uyghur diyarighimu keng tonulghan kompozitor bolup, u qazaqistan döletlik muzika institutining qurghuchi rehberliridin biri süpitide peqet Uyghurlarla emes, belki köpligen qazaq, rus we bashqa millet muzikantlirining yétiship chiqishidiki ustazlardin biri idi.

Özining simfoniye we opéra ijadiyitining asasliq qismini Uyghur xelqining milliy azadliq küresh témilirigha béghishlighan quddus ghojamyarof 1945-yilidiki sherqiy türkistan jumhuriyitining batur jengchisi rizwan'gülning qehrimanliq küresh hayatigha béghishlighan "Rizwan'gül" simfoniyesining muweppeqiyiti üchün 1951-yili sowét ittipaqining eng aliy dölet mukapatigha érishken idi.

Shuningdin kéyin u "Sadir palwan", "Nazugum", "Chintömür batur" qatarliq opéra we balét muzikiliri, "Teklimakan", "Meshrep", "Abdulla rozibaqiyéf" qatarliq simfoniyeliri hemde sinfoniyelik dastan "Rizwan'gül" qatarliq bir qanche chong hejimlik muzika eserliri hem her xil naxsha-muzikilirini ijad qilghan shuningdek uning simfoniye eserliri moskwa, almuta we bashqa sheherlerde orundalghan idi.

Quddus ghojamyarof muzika kespini almuta we moskwadiki muzika institutlirida alghan bolup, uzun yillar qazaqistan muzika institutining mudiri we proféssori bolup ishligen. Qolgha keltürgen zor netijiliri üchün, uninggha "Sowét ittipaqining xelq artisi" dégen eng yuqiri nam bérilgen idi. U 1994-yili, 8-aprél küni almutada 75 yéshida wapat bolghan.

Toluq bet