Қазақистанниң соти мирзақамақтики серикҗан билашоғлиниң әрзини рәт қилди

Мухбиримиз әркин
2019-06-14
Елхәт
Пикир
Share
Принт

Қазақистан пайтәхти нурсултандики бир оттура сот мәһкимиси 14‏-июн күни йепиқ сот ечип, қазақистандики кишилик һоқуқ паалийәтчиси, «атаюрт пидаийлири» тәшкилатиниң рәһбири серикҗан билашоғлиниң мирзақамақни узартқанлиқиға наразилиқ билдүрүп қилған әрзини рәт қилған.

Вәқәдин хәвәрдар кишиләрниң радийомизға билдүрүшичә, сот мәһкимиси әрзини рәт қилип, сотниң мирзақамақни 10‏-июлға қәдәр узартиш тоғрисидики қарарини сақлап қалған.

Қазақистан пайтәхтидики бир йәрлик сот мәһкимиси йеқинда билашоғлиға мирза қамақни йәнә бир ай узартишқа буйруған. Бу қазақистан әдлийә тармақлириниң уни давамлиқ мирзақамақта тутуп турушни 2‏-қетим узартиши иди. Серикҗан билашоғлиниң қазақистанда «атаюрт пидаийлири» тәшкилати қуруп, уйғур районидики қазақларниң кишилик һоқуқни, лагердики қазақ вә уйғур тутқунларниң қоюп берилишини тәләп қилиши, хитай даирилирини вә қазақистан һөкүмитини қаттиқ биарам қилип кәлгән. У бу йил 3‏-айда алмутада тутқун қилинип, пайтәхт нурсултанға елип кетилгән. Даириләр уни «етник өчмәнликкә қутратқулуқ қилиш» билән әйиблигән иди. Лекин униң адвокати айман өмәрованиң йеқинда радийомизға нөвәттә қазақистан тәптиш даирилириниң уни кишиләрни хитайға қарши «җиһат» қа чақириш билән әйибләшкә тәйярлиқ қиливатқанлиқини билдүргән. Айман өмәрованиң илгири сүрүшичә, серикҗан билашоғли бу йил 2‏-айда алмутадики бир рестурантта нутуқ сөзләп, кишиләрни иҗтимаий таратқуларда хитайға қарши «ахбарат җиһади» елип беришқа чақирғаникән.

Айман өмәрова, билашоғлиниң «җиһат» қа чақирғанлиқини рәт қилип, униң «ахбарат җиһати» дегән сөзни «ахбарат күриши» дегән мәнидә ишләткәнликини билдүргәниди. Вәқәдин хәвәрдар кишиләрниң радийомизға билдүрүшичә, 14‏-июн ечилған сотқа билашоғлиниң қоллиғучилиридин 200 дәк адәм қатнишишни тәләп қилған болсиму, лекин даириләр уларниң сотқа қатнишишини рәт қилған. Буниңдин нарази болған кишиләр сот мәһкимисиниң алдида ахбарат йиғини өткүзүп, билашоғлини қоллайдиғанлиқи, қазақистан даирилиригә болған наразилиқини ипадилигән.

Пикирләр (0)
Share
Толуқ бәт