Қазақистанлиқ уйғур балилар хәлқара мусабиқидә алтун медалға еришти

Әрәб бирләшмә хәлипиликиниң пайтәхти абу-дәбидә өткүзилүватқан балиларниң “җу-җитсу”,йәни япончә өзини қоғдаш вә қоралсиз елишиш тәнһәрикәт түри бойичә хәлқаралиқ мусабиқигә қазақистан балилар командисиниң тәркибидә қатнашқан икки нәпәр қазақистанлиқ уйғур өсмүр алтун медалға еришкән.

Абу-дәбидә өткүзүлгән мәзкур хәлқаралиқ ““җу-җитсу”йәни япончә елишиш мусабиқисигә қазақистан өсмүрлириниң командисиға мәзкур испорти түри бойичә мәшқавул арманҗан розахуноф йетәкчилик қилған.

Мусабиқә башланғандин буянқи үч күнлүк мусабиқә җәрянида қазақистан командиси үч алтун медал вә төт күмүш медал алған.

Қазақистанда рус тилида тарқитилидиған “пәрваз” торида берилгән бу һәқтики хәвәрдин мәлум болушичә, қазақистан командисиниң йетәкчиси арманҗан розахунофниң оғли камал розахуноф вә қазақистан җумһурийәтлик “җу-җитсу” тәнһәрикәт бирләшмисиниң муавин президенти рустәм абдусаламофниң оғли абдусалам абдусаламоф алтун медалға еришкән. Булардин башқа йәнә қазақ, рус балиларму алтун, күмүш вә мис медалларни қолға кәлтүргән.

“The National” ториниң хәвиридә көрситилишичә, 10-апрелдин башлап, 23-апрелғичә өткүзүлидиған бу мусабиқигә 100дин артуқ дөләттин 7 миңдин артуқ маһир қатнашқан болуп, өсмүр балиларниң һәр қайси түрдики мусабиқисиниң дәсләпки үч күнидила һәр қайси дөләтләрдин кәлгән маһирлар 34 алтун медал вә 41 күмүш медалға еришкән.

Мәлум болушичә, йәккә елишиш тәнһәрикәтлириниң бир түри һесаблинидиған “җу-җитсу” әсли японийәдә пәйда болуп, кейин бразилийәдә ронақ тапқан вә һазир көп дөләтләргә кеңәйгән. Бу, өзини қоғдаш вә қоралсиз һалда мушт билән рәқибигә йеник усулда зәрбә бериш маһаритини тәләп қилидиған елишиш түрлириниң биридур. Қазақистан, өзбекистан, русийә қатарлиқ әлләрдиму бу тәнһәрикәткә қизиқиш юқири болуп, қазақистандики уйғурлар арисидиму бу түр билән шуғуллинидиған өсмүрләр көпийишкә башлиған иди. Әмма уйғур диярида бу хил тәнһәрикәт түриниң уйғурлар арисидики әһвали намәлум.