Qazaqistan'gha tutqun qilin'ghan qirghizistanliq muzikant rozaxonof qirghizistan'gha qayturulghan

• Muxbirimiz erkin
  2022-01-10

Ötken hepte qazaqistanda tutqun qilinip, “Chet'ellik térrorchi” dep élan qilin'ghan qirghizistanliq ataqliq muzikant wikram rozaxunof 10-yanwar qirghizistan'gha qayturup kélin'gen. Wikram rozaxunofning ötken hepte qazaqistanda partlighan keng kölemlik naraziliq herikitini basturushta qazaqistan amanliq küchliri teripidin tutqun qilinip, “Chet'ellik térrorchi” dep élan qilinishi we téléwizorgha chiqirip, iqrar qildurulushi qirghizistan hökümitining naraziliqini qozghighan.

Melum bolushiche, qirghizistan tashqi ishlar ministirliqi qazaqistan'gha nota tapshurghan, shundaqla qirghizistan dölet xewpsizlik komitéti rozaxunofning térrorluq bilen alaqisi barliqini ret qilghan. Bu weqe qirghizistan yene jama'et pikirining naraziliqini qozghighanidi. Qirghizistan AKI axbarat agéntliqining xewer qilishiche, wikram rozaxunof bishkekke qaytip kélip, muxbirlargha özining qazaqistan téléwizorida qilghan sözlirige chüshenche bergen. U, özining tutqunda “‍Eger téléwizorgha chiqip iqrar qilsa qirghizistan'gha qayturulidu” dégenliki üchün “Xata iqrarda bolghanliqi” ni éytqan.

U: “Widé'oda qilghan sözlirimning hemmisi yalghan, bu qaytip kélishimning eng asan yoli idi” dégen. Rozaxunof qazaqistan taratqulirining taratqan widé'osida, özining 200 dollar bérimiz, dégenliki üchün qazaqistandiki naraziliqqa qatnishishqa kelgenlikini bildürgen. Buning aldida prézidént toqayéf, qazaqistanning “Chet'elde terbiyelen'gen térrorchilar” ning hujumigha uchrighanliqi, “20 Ming bandit” ning almuta shehirige hujum qilghanliqini éytqan. B b s ning xewer qilishiche, toqayéf 10-yanwar bu toqunushni “Bir merkezdin” orunlashturulghan “Siyasiy özgirish” dep körsetken. Qazaqistan ichki ishlar ministirliqi, bu weqede 160 tin artuq adem ‍ölgenliki, hazirgha qeder 8 minggha yéqin adem tutqun qilin'ghanliqini bildürgen.