Qazaqistandiki sabiq yuqiri derijilik hökümet meslihetchisi we tetqiqatchi tutqun qilin'ghan

Muxbirimiz sada
2019-07-10
Élxet
Pikir
Share
Print

Yéqinda qazaqistandiki sabiq yuqiri derijilik hökümet meslihetchisi, doktor konstantin siroyézhkin "Xitay hökümiti bilen hemkarliship qazaqistan dölet ichide jasusluq bilen shughullan'ghan" dégen eyiblesh bilen tutqun qilin'ghan.

Amérikada chiqidighan "Walsitrét zhurnili" gézitining 10-iyuldiki xewirige qarighanda, konstantin siroyézhkin ilgiri sabiq sowét ittipaqining dölet bixeterlik komitéti, yeni k g b ning xadimi we xitay ishliri mutexessisi bolup ishligen iken. Qazaqistan bixeterlik da'iriliri uning bu qétim tutqun qilinish sewebini qazaqistanning yuqiri derijide mexpiy tutulidighan höjjitini xitay jasuslirigha yollap bergenliktin bolghanliqini bildürgen.

Xewerde otturigha qoyulghan bir qiziq nuqta, konstantin siroyézhkin tutqun qilinip bir ay ötkendin kéyin qazaqistan da'iriliri bu ishni shu yerlik taratqularda élan qilinishigha yol qoyghan we buning béyjing da'irilirining ottura asiyadiki döletlerde künsayin éshiwatqan tesir küchige qarita kem uchraydighan bir ammiwi qarshiliq urunushi ikenliki ilgiri sürülgen.

Xewerde yene moskwadiki yuqiri derijilik iqtisadshunasliq mektipining xitayni tetqiq qilghuchisi wasiliy kashinning bu heqte söz qilip, "Bu ishning jem'iyetke ashkarilinishidin qazaqistan da'irilirining xitaygha qazaqistanda bek heddidin éship ketmesliki we bek yiraq yerlerge qol sozmasliqi heqqide bir uchur bériwatqanliqidin dérek béridu," dégenliki bayan qilin'ghan.

"Yawro'asiyanét" torining xewer qilishiche, 62 yashliq syroyézhkin ilgiri qazaqistan prézidént memuriyitining analizchi-meslihetchisi, istratégiye tetqiqat institutida yuqiri derijilik tetqiqatchi bolup xizmet qilghan. Melum bolushiche, u xitayning ichki siyasiti, Uyghur élidiki siyasiy-iqtisadiy we milletler mesilisi, qazaqistan-xitay munasiwetlirige a'it köpligen eserlerni yézip élan qilghaniken.

Toluq bet