Qazaqistan tashqi ishlar ministirliqi xitay hökümitini qazaqlargha adil mu'amile qilishqa chaqirghan

Muxbirimiz irade
2019-01-24
Élxet
Pikir
Share
Print

Anadolu agéntliqining xewer qilishiche, qazaqistan tashqi ishlar ministirliqining bayanatchisi aybek simadiyarof düshenbe künidiki axbarat élan qilish yighinida Uyghur élidiki lagérlardin qoyuwétilgen bir qisim qazaqlarning nöwette öz öyliride nezerbendke élin'ghanliqi heqqidiki so'allargha jawab bergen.

U sözide "Biz xitay hökümitini qanun boyiche obyéktip we adil ish körüshke dewet qilimiz" dégen. U sözide "Biz xitay terep bilen yéqindin hemkarlishiwatimiz" dégen bolsimu, emma sözi dawamida xitayda hazir 1 yérim milyon etrapida qazaq barliqini, biraq xitay hökümitining bu qazaqlargha pasport bermeywatqanliqini éytqan.

Ötken heptilerde qazaqistan tashqi ishlar ministirliqining bergen bayanatigha asasen herqaysi chong xewer agéntliqlirida xitay hökümitining lagérlardiki qazaq tutqunlardin ikki ming kishini qoyup bérishke maqul bolghanliqi keng xewer qilin'ghan idi. Bu mesilide qazaqistanda aktip pa'aliyet körsitiwatqan "Ata yurt pida'iyliri" teshkilatining bashlamchisi sérikjan bilash'oghli radiyomizgha qilghan sözide gerche qazaqistan tashqi ishlar ministirliqi arqiliq herqaysi taratqularda mushundaq xewer bérilgen bolsimu, emma hazirghiche xitay tereptin zadi qanche qazaqni qoyup bergenliki, qanchilik ademni qazaqistan chégrasidin ötüshke ruxset qilghanliqi heqqide héchqandaq éniq melumat yoqlighini bildürgen idi. Uning éytishiche, hazirche qazaqistan'gha qaytip kelgen we "Ata yurt pida'iyliri" teshkilatigha özini melum qilghan qazaqistan puqraliri peqet 100 neperdin ashidiken.

Uyghur élide yolgha qoyulghan lagérlarning zerbisige uchrighan qazaqistan puqraliqidiki qazaq we Uyghurlar nöwette bu lagérlardiki emeliyetlerni ashkarilashta zor rol oynimaqta. Yéqinda lagérdin qoyup bérilgendin kéyin qazaqistan'gha qaytip kétishke ruxset qilin'ghan jarqinbeg isimlik bir qazaq yashning rohiy saghlamliqidin ayrilip, öz ata-anisi we xotun-balilirinimu tonumas halgha kélip qalghanliqigha a'it sin körünüshi ijtima'iy taratqularda tarqitilip zor inkas qozghidi.

Toluq bet