Qazaqistan saqchiliri uruq-tughqanliri Uyghur diyarida tutqundiki qazaqlarning almutadiki xitay konsulxanisigha erz qilishini tosqan

Qazaqistan saqchiliri uruq tughqanliri xitayning Uyghur rayonidiki jaza lagérlirigha qamalghan qazaq puqralirining almutada turushluq xitay konsulxanisi aldigha bérip naraziliq bildürüshini tosqan.

Merkizi chéxiye paytexti piragadiki azadliq radiyosi” ning xewiride, qazaqistan saqchilirining ötken hepte almutadiki xitay konsulxanisi aldigha bérip, uruq-tughqanlirining qoyup bérilishini telep qilmaqchi bolghan besh neper qazaq er we ayalni tosqanliqi, ularning xitay konsulxanisigha naraziliq bildürüshige yol qoymighanliqini bildürmekte

Erzdarlarning “Azadliq radi'osi” gha bildürüshiche, ular Uyghur diyaridiki uruq-tughqanliri diniy ibadet qilghanliqi yaki torgha uchur yollighanliqi üchün tutqun qilinip, atalmish “Qayta-terbiyelesh” lagérlirigha qamalghan iken.

Xewerde, erzdarlarning “Azadliq radiyosi” gha “Bu, xitayning qazaq, Uyghur, qirghiz, shundaqla rayondiki bashqa yerlik xelqlerge qaratqan irqiy qirghinchiliq siyasitige qarshi élip bérilghan naraziliq herikiti” ning 1000-küni ikenlikini éytqanliqi qeyt qilinmaqta.

Melum bolushiche, xitayning almutada turushluq konsulxanisi ilgiri qazaq puqralirining naraziliq heriketlirige qarita bayanat élan qilip, Uyghur rayonida tutqundiki étnik qazaqlarning xitay puqrasi ikenliki we ularning xitay qanunlirigha xilapliq qilghanliqi üchün tutup turuluwatqanliqini bildürgen. Bu jeryanda xitay bezi qazaq erzdarlirining uruq-tughqanlirini qoyup bérip, ularning qazaqistan'gha chiqip kétishige yol qoyghan.

Amérika tashqi ishlar ministirliqi ilgiri qazaqistanni Uyghur rayonidiki qazaq, Uyghur qatarliq xelqlerge qarita élip bériwatqan “Irqiy qirghinchiliqi” gha süküt qilmasliqqa chaqirghan bolsimu, lékin qazaqistan xitayni tenqid qilishtin özini qachurupla qalmay, b d t ning bezi yighinlirida xitayning Uyghur rayonidiki siyasitini qollap awaz bergen.