Уйғур районилиқ қазақ қизи қазақистан сотидин өзигә панаһлиқ беришни тәләп қилған

Мухбиримиз әркин
2019-11-13
Елхәт
Пикир
Share
Принт

2018‏-Йили 5‏-айда уйғур районидин қазақистанға қечип чиққан бир етник қазақ аял 12‏-ноябир күни қазақистанниң яркәнт шәһридә чеградин қанунсиз кириш билән әйиблинип сотланған. «Азадлиқ радийоси» ниң хәвәр қилишичә, сотта 36 яшлиқ қайша ақан исимлик мәзкур қазақ аял өзиниң хитайға қайтурулса җазалинидиғанлиқи, шуңа қазақистанниң панаһлиқ беришини тәләп қилидиғанлиқини билдүргән.

У сотта йәрлик даириләрниң өзини йиғиелиш лагериға қамаш билән тәһдит салғанлиқи сәвәблик 2018‏-йили 5-айда қазақистан чеграсидин қанунсиз өтүшкә мәҗбур болғанлиқини билдүргән. Қайша ақан йеқинқи бир қанчә һәптә ичидә чеградин қанунсиз өтүп, қазақистандин сияси панаһлиқ тилигән 3‏-етник қазақ кишидур. 

Йеқинда қазақистан һөкүмити чеградин қанунсиз өткән 2 нәпәр қазақ яшқа сиясий панаһлиқ бәргән. Мурашер алмули, қастер мусахан оли исимлик бу икки қазақ яш бир қанчә һәптә аввал алмутада ахбарат йиғини өткүзгән болуп, мурашер алмули өзиниң уйғур районида җазаланғанлиқи, қастер мусаханули өзиниң бир қанчә йил йиғивелиш лагерида ятқанлиқини елан қилған. Бу иккәйлән дәрһал тутқун қилинип, арқидинла уларға сиясий панаһлиқ берилгән. Лекин қазақистан һөкүмити уларға сияси панаһлиқ беришниң алдида сайрагүл саутбай исимлик қазақ аялниң сияси паналиқ илтимасини рәт қилған. Нәтиҗидә, шветсийә сайрагүл саутбай вә униң аилисигә панаһлиқ берип, бу йилниң башлирида шветсийәгә елип кәлгәниди. 

«Азатлиқ радиоси» ниң хәвиридә нәқил кәлтүрүлүшичә, 12‏-ноябирдики сотта қайша ақан сөз қилип, «мән қазақистанға панаһлиқ тиләп чиқтим. Силәрниң мени хитайға қайтурмаслиқиңларни тәләп қилимән. Мән қайтурулсам җазалинишим мумкин» дегән. Қайша ақанниң билдүрүшичә, униң 70 яшлиқ аниси, униң бурунқи йолдиши вә оғли йәнила уйғур районида қалған икән. Кишилик һоқуқ тәшкилатлириниң илгири сүрүшичә нөвәттә хитай һөкүмити 2милйондәк уйғур, қазақ вә башқа а мусулманларни йиғивелиш лагерлириға қамап, уларниң бир қисмини җазалиған, бир қисмини тоқумичилқи карханилирида мәҗбури әмгәккә салмақта икән.

Толуқ бәт