Uyghur rayoniliq qazaq qizi qazaqistan sotidin özige panahliq bérishni telep qilghan

Muxbirimiz erkin
2019-11-13
Élxet
Pikir
Share
Print

2018‏-Yili 5‏-ayda Uyghur rayonidin qazaqistan'gha qéchip chiqqan bir étnik qazaq ayal 12‏-noyabir küni qazaqistanning yarkent shehride chégradin qanunsiz kirish bilen eyiblinip sotlan'ghan. "Azadliq radiyosi" ning xewer qilishiche, sotta 36 yashliq qaysha aqan isimlik mezkur qazaq ayal özining xitaygha qayturulsa jazalinidighanliqi, shunga qazaqistanning panahliq bérishini telep qilidighanliqini bildürgen.

U sotta yerlik da'irilerning özini yighi'élish lagérigha qamash bilen tehdit salghanliqi seweblik 2018‏-yili 5-ayda qazaqistan chégrasidin qanunsiz ötüshke mejbur bolghanliqini bildürgen. Qaysha aqan yéqinqi bir qanche hepte ichide chégradin qanunsiz ötüp, qazaqistandin siyasi panahliq tiligen 3‏-étnik qazaq kishidur. 

Yéqinda qazaqistan hökümiti chégradin qanunsiz ötken 2 neper qazaq yashqa siyasiy panahliq bergen. Murashér almuli, qastér musaxan oli isimlik bu ikki qazaq yash bir qanche hepte awwal almutada axbarat yighini ötküzgen bolup, murashér almuli özining Uyghur rayonida jazalan'ghanliqi, qastér musaxanuli özining bir qanche yil yighiwélish lagérida yatqanliqini élan qilghan. Bu ikkeylen derhal tutqun qilinip, arqidinla ulargha siyasiy panahliq bérilgen. Lékin qazaqistan hökümiti ulargha siyasi panahliq bérishning aldida sayragül sa'utbay isimlik qazaq ayalning siyasi panaliq iltimasini ret qilghan. Netijide, shwétsiye sayragül sa'utbay we uning a'ilisige panahliq bérip, bu yilning bashlirida shwétsiyege élip kelgenidi. 

"Azatliq radi'osi" ning xewiride neqil keltürülüshiche, 12‏-noyabirdiki sotta qaysha aqan söz qilip, "Men qazaqistan'gha panahliq tilep chiqtim. Silerning méni xitaygha qayturmasliqinglarni telep qilimen. Men qayturulsam jazalinishim mumkin" dégen. Qaysha aqanning bildürüshiche, uning 70 yashliq anisi, uning burunqi yoldishi we oghli yenila Uyghur rayonida qalghan iken. Kishilik hoquq teshkilatlirining ilgiri sürüshiche nöwette xitay hökümiti 2milyondek Uyghur, qazaq we bashqa a musulmanlarni yighiwélish lagérlirigha qamap, ularning bir qismini jazalighan, bir qismini toqumichilqi karxanilirida mejburi emgekke salmaqta iken.

Toluq bet