Qazaqistan ikki neper qazaq siyasi panahliq iltijachisini xitaygha qayturup béridighanliqini bildürdi

Muxbirimiz erkin
2019-12-06
Élxet
Pikir
Share
Print

Qazaqistan dölet bixeterlik komitéti 6‏-dékabir küni qazaqistan'gha qéchip chiqip siyasi panahliq sorighan ikki neper qazaq siyasiy panahliq iltijachisini xitaygha qayturup béridighanliqinir élan qilghan.

Kastér musaxan we muraghér alim oli isimlik ikki qazaq siyasi iltijachisi yéqinda widiyoda chaqiriq élan qilip, özlirining chégradin qanunsiz ötüp qazaqistan'gha qéchip chiqqanliqi, qazaqistanning özlirige siyasi panahliq bérishini telep qilghan. Ular özlirining Uyghur rayonida xitay da'ilirining tutqun qilishi we qiyin-qistaqlirigha uchrighanliqini élan qilghanidi. Lékin, fransiye agéntliqining xewer qilishiche, qazaqistan dölet bixeterlik komitétining mu'awin bashliqi darxan dilmanof jüme küni yutub qanilida söhbet élan qilip, pat arida échilidighan sottin kéyin, bu ikkeylenning qazaqistanda "Qélish mumkinchiliki yoq" dégen. 

Eger qazaqistan bu ikkeylenni xitaygha rast ötküzüp berse, bu, ularning qazaqistan'gha qéchip chiqip panahliq sorighan Uyghur aptonom rayonida olturushluq yerlik milletlerni tunji qétim xitaygha ötküzüp bérishi bolmaydu. Qazaqistan 1990-yillardin béri nurghun Uyghur musapirlirini tutqun qilip, xitaygha qayturup bérip kelgen. Peqet xitayning 2017‏-yili bashlan'ghan keng kölemlik tutqunida qazaqlarmu tutqun'gha uchrighandin kéyin, bu sepke ularmu qétilishqa bashlighan. Ilgiri qazaqistan hökümiti qazaqistan'gha qéchip chiqqan sayragül sa'utbay isimlik bir lagér terbiyi'echisi qazaq ayalni chégradin qanunsiz kirish bilen eyiblep sotlighan. Gerche sa'utbay sayragül qoyup bérilgen bolsimu, lékin qazaqistan uninggha siyasi panahliq bérishni ret qilghan. Axiri, uninggha bu yil shwétsiye siyasiy panahliq bergenidi. 

Fransiye agéntliqining xewiride qeyt qilishiche, darxan dilmanof kastér musaxan we muraghér alim oli heqqide yene "Bu ehwalda biz ularni xitay xelq jumhuriyitige ötküzüp bérimiz" dégen. Amérika hökümiti we xelqara kishilik hoquq teshkilatliri bashqa döletlerni Uyghur aptonom rayoni tewelikidiki "Herqandaq bir yerlik millet musapirini xitaygha qayturup bermeslik" ke chaqirip kelgenidi.

Toluq bet