Қазақистан уйғур елидин қечип чиққан икки қазаққа мусапирлиқ салаһийити бәргән

Мухбиримиз ирадә
2019-10-29
Елхәт
Пикир
Share
Принт

Қазақистан даирилири йеқинда уйғур елидин қазақистанға қечип чиққан икки нәпәр қазаққа мусапирлиқ салаһийити беришни қарар қилған.

Азатлиқ радийосиниң бу һәқтики хәвиридин мәлум болушичә, юқиридики қарар қазақистан көчмәнләр идариси тәрипидин 29-өктәбир күни елан қилинған. 

30 яшлиқ қастер мусақанули вә 25 яшлиқ мурагер әлимули тарбағатай вилайитиниң дөрбилҗин наһийәсидин болуп, улар бу йил 1-өктәбир күни чегрини бөсүп чиқип, қазақистан чеграсидин қанунсиз өткән. Улар 14-өктәбир күни ахбарат елан қилиш йиғини орунлаштуруп өзлириниң хитайда тәқибләшкә учриғанлиқини җакарлиған. Қастир мусақанули шу күни өзиниң бир қанчә йил уйғур елидики «қайта тәрбийә лагери» да ятқанлиқини, қазақларниң хитай даирилири тәрипидин тәқибләш вә сүргүнгә учраватқанлиқини, уларниң һоқуқлириниң дәпсәндә қилинип, «сиясий тәрбийәләш лагерлириға» қамиливатқанлиқини баян қилған. 

Мәлум болушичә, бу қазақистан даирилириниң тунҗи қетим уйғур елидин қечип чиққан бир кишигә мусапирлиқ салаһийити бериши болуп һесаблинидикән. Қазақистан даирилири 2018-йили 4-айда уйғур елидин қечип чиққан сайрагүл савутбайға бундақ салаһийәт беришни рәт қилғаниди. Гәрчә улар хәлқараниң бесими билән сайрагүлни хитайға өткүзүп бәрмигән болсиму, бирақ униң қазақистанда қелишиға йол қоймиған. Сайрагүл нөвәттә йолдиши билән бирликтә шиветсийәдә панаһланмақта. Сайрагүл уйғур елидики мәзгилидә лагирда оқутқучилиқ қилған болуп, у нөвәттә лагир ичидики әһваллар һәққидә хәлқаралиқ мәтбуатларни муһим учурлар билән тәминлимәктә.

Пикирләр (0)
Share
Толуқ бәт