Qazaqistan Uyghur élidin qéchip chiqqan ikki qazaqqa musapirliq salahiyiti bergen

Muxbirimiz irade
2019-10-29
Élxet
Pikir
Share
Print

Qazaqistan da'iriliri yéqinda Uyghur élidin qazaqistan'gha qéchip chiqqan ikki neper qazaqqa musapirliq salahiyiti bérishni qarar qilghan.

Azatliq radiyosining bu heqtiki xewiridin melum bolushiche, yuqiridiki qarar qazaqistan köchmenler idarisi teripidin 29-öktebir küni élan qilin'ghan. 

30 Yashliq qastér musaqanuli we 25 yashliq muragér elimuli tarbaghatay wilayitining dörbiljin nahiyesidin bolup, ular bu yil 1-öktebir küni chégrini bösüp chiqip, qazaqistan chégrasidin qanunsiz ötken. Ular 14-öktebir küni axbarat élan qilish yighini orunlashturup özlirining xitayda teqibleshke uchrighanliqini jakarlighan. Qastir musaqanuli shu küni özining bir qanche yil Uyghur élidiki "Qayta terbiye lagéri" da yatqanliqini, qazaqlarning xitay da'iriliri teripidin teqiblesh we sürgün'ge uchrawatqanliqini, ularning hoquqlirining depsende qilinip, "Siyasiy terbiyelesh lagérlirigha" qamiliwatqanliqini bayan qilghan. 

Melum bolushiche, bu qazaqistan da'irilirining tunji qétim Uyghur élidin qéchip chiqqan bir kishige musapirliq salahiyiti bérishi bolup hésablinidiken. Qazaqistan da'iriliri 2018-yili 4-ayda Uyghur élidin qéchip chiqqan sayragül sawutbaygha bundaq salahiyet bérishni ret qilghanidi. Gerche ular xelq'araning bésimi bilen sayragülni xitaygha ötküzüp bermigen bolsimu, biraq uning qazaqistanda qélishigha yol qoymighan. Sayragül nöwette yoldishi bilen birlikte shiwétsiyede panahlanmaqta. Sayragül Uyghur élidiki mezgilide lagirda oqutquchiliq qilghan bolup, u nöwette lagir ichidiki ehwallar heqqide xelq'araliq metbu'atlarni muhim uchurlar bilen teminlimekte.

Toluq bet