Xitay "Qeshqer güli" namliq filim arqiliq xitaylarni Uyghur élida yiltiz tartishqa chaqirmaqta

Muxbirimiz irade
2020-12-03
Share

Xitay da'iriliri üch ewlad xitay a'ili'isning Uyghur élige köchüp kélip yiltiz tartishi bash téma qilin'ghan "Qeshqer güli" namliq bir filim ishligen.

"Xitay xewerliri" torining bu heqtiki xewiridin qarighanda, ular filimni teshwiq qilish meqsitide aldi bilen filimni 1950-yillarda Uyghur élige köchürülgen xitaylarning wekillirige qoyup bergen.

Xewerde éyitlishiche, ularning ichidiki biri filimni körgendin kéyin mundaq dégen: "Biz 20-esirning 50-yillirida gu'angdungdin shinjanggha kadir bolup qobul qilinip kelgen. Eyni waqitta jem'iy 11ming adem bar idi, ularning köpinchisi ottura we toluq ottura mektep oqughuchiliri idi. Ularning köpinchisi kespler boyiche terbiyelinip, shinjangning herqaysi jaylirigha teqsim qilin'ghan. . . 90 Yashqa yéqinlashqan xu'ang yüyünning éytishiche, kinodiki yüen shöning dadisi we bowisigha oxshash nurghun kishiler shu chaghda döletning chaqiriqigha awaz qoshup, shinjangning qurulushini qollap, shinjangda bir ömür yiltiz tartti."

Xitay hökümiti 2017-yili Uyghur élida keng kölemlik tutqunni yolgha qoyup, milyonlighan Uyghurni lagérlargha qamighandin kéyin, yillardin béri her xil shekillerde dawam qildurup kelgen yuqiriqidek xitay köchmen yötkesh siyasitini hessilep kücheytken idi.

Chet ellerdiki Uyghur közetküchiler "Qeshqer güli" dep nam bérilgen bu filimning del xitay hökümiti hazir ijra qiliwatqan siyasetlerge mas halda, xitaylarni yenimu köplep Uyghur élige köchüp, yiltiz tartip, Uyghur élini toluq ishghal qilishqa ündesh meqsitide ishlen'genlikini perez qilishmaqta.

Mezkur filim heqqidiki xewerde yene xitaylar kélip yerleshkendin kéyin, qeshqerning ghayet zor tereqqiyatlargha érishkenliki we filimde qeshqerning yéngi qiyapitini körgen xitaylarning "Biz töligen bedellirimizning bikargha ketmigenlikini körüp xursen bolduq," dégenliki bayan qilin'ghan.

Halbuki Uyghur közetküchiler "Bu filim xitayning Uyghur élidiki ishghal tarixini yorutup béridu," dep qarimaqta.

Melum bolushiche, "Qeshqer güli" dep nam bérilgen bu filim kéler yilining béshida qoyulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet