Qeshqer bilen xongkong arisida biwasite hawa qatnishi bashlan'ghan
2024.07.01
7-Ayning 1-künidin bashlap Uyghur élining qedimki medeniyet böshükliridin qeshqer shehiri bilen xongkong arisida biwasite hawa qatnishi yolgha qoyulghan. Xitay taratqulirining bildürüshiche, 1-iyul küni qeshqer leyning xelq'ara ayrodurumidin tunji yoluchilar ayropilani xongkong xelq'ara ayrodurumigha uchqan. Bu, Uyghurlargha qaritilghan irqiy qirghinchiliq we mejburiy emgek sewebidin xitay gherb ellirining émbargosi yaki bayqut qilishigha uchrawatqan bir peytte, xitayning mezkur rayonni xelq'aragha téximu keng échish pilanining bir parchisi, dep qaralmaqta. Xitay hökümiti ötken yilning bashliri memliket miqyasidiki korona wirusi yuqum qamalini bikar qilghandin kéyin, Uyghur élige séliwatqan sélinmini téximu köpeytip, ishlepchiqirish salmiqini téximu ashurghan, rayonni sirtqa échiwétish qedimini téximu kéngeytken idi.
“Xitay xewerliri” torining uchuridin melum bolushiche, 1-iyul küni bashlan'ghan qeshqer bilen xongkong arisidiki biwasite yoluchilar hawa qatnishi, qeshqerdin xitayning sherqiy jenubidiki xongkong, makaw, teywen rayonigha échilghan tunji biwasite hawa qatnishi bolupla qalmay, belki yene qeshqer bilen gu'angju, qeshqer bilen shénjéndin kéyinki qeshqerdin gu'angdung, makaw, xongkong rayonigha biwasite uchidighan 3-hawa yoli liniyesi iken. Xitay taratqulirining xewerliride, qeshqer-xongkong arisidiki yéngi hawa qatnishi qeshqer bilen xitayning sherqiy jenubidiki chong qoltuq rayoni bilen bolghan hawa qatnishi torini shekillendürgenlikini ilgiri sürmekte.
Xitay hökümiti Uyghur élide 2027-yili bashlan'ghan chong tutqunidin béri, mezkur rayonni xitayning déngiz boyidiki sheherler bilen tömüryol, hawa qatnishi arqiliq torlashturup, nopus we mebleghning bu rayon'gha éqishini téximu tézleshtürgen. Halbuki, buning Uyghurlarni rayonda téximu az sanliq orun'gha chüshürüp qoyushi, ularning téximu qattiq yeklinishini keltürüp chiqirishidin endishe qiliwatqan kishilik hoquq teshkilatliri, gherb elliridin Uyghur élige qaratqan jaza we bayqutni téximu kücheytishni telep qilmaqta. “Xitay xewerliri” torining bildürüshiche, qeshqerdin xongkonggha uchidighan yoluchilar ayropilani her heptining düshenbe küni seherde yolgha chiqip, shu küni chüshtin yene qeshqerge qaytip kélidiken.