Xitay da'iriliri eyibleshlerge qarimay qeshqerde sayahetni zor küch bilen tereqqiy qildurghan
2024.05.02
Kishilik hoquq teshkilatliri we bir qisim démokratik döletler xitay hökümitini “Insaniyetke qarshi jinayet we irqi qirghinchiliq” ni yoshurush üchün Uyghur rayonida sayahetni küchep tereqqiy qildurdi dep qarap, Uyghur diyarigha bérip sayahet qilishni chekleshni teshebbus qilghanidi. Halbuki, xitay hökümiti qeshqerge toxtimay meblegh sélip, sün'iy qedimiy sheher, soda-bazar we körgezme merkezlirini qurup, sayahetchilikni zor küch bilen tereqqiy qildurghan.
“Shinjang kündilik géziti” ning 2024-yili 5-ayning 2-künidiki xewirige asaslan'ghanda, qeshqer xelq'ara ayrodurumidiki yoluchilar sani 12 minggha, uchush qétim sani 102 ge yetken. 4-Ayning 29-küni, qeshqer xelq'ara ayrodurumining kündilik uchush sani ishqa kirishtürülgendin buyan tunji qétim 100 din éship, 103 ayropilan'gha yetken.
Mezkur xewerde déyilishiche, qeshqer xelq'ara ayrodurumi xitay boyiche 56 liniyelik, xelq'ara boyiche bir liniyelik qilip layihelen'gen. 2024-Yili qeshqer-wuxen liniyesi resmiy eslige keltürülüp, qeshqerdin wuxen'ge biwasite uchidighan ayropilan 12sa'ettin 6 sa'etke chüshürülgen.
Yéqinda Uyghur kishilik hoquq qurulushi mexsus doklat élan qilip, xelq'ara sayahet shirketliri Uyghur rayonigha sayahet teshkillise yerlik Uyghurlargha qilche paydisi bolmaydighanliqini, belki Uyghurlargha irqiy qirghinchiliq yürgüzüwatqan xitayning bu weziyetni normal körsitishige we jinayitini yoshurushigha yardem béridighanliqini otturigha qoyghan hemde Uyghur diyarigha sayahet teshkilleshni toxtitishqa chaqirghanidi.
Amérika dölet mejlis ezaliridin kiris simis we jéf mérkli yéqinda amérika tashqi ishlar ministiri antoniy bilinkén'ge xet ewetip, amérika puqralirining Uyghur diyarigha sayahetke bérishini cheklishini, xitayning Uyghur diyarida élip bériwatqan wehshiy jinayitini yoshurush üchün yolgha quyuwatqan sayahetchilik teshwiqatlirigha aldanmasliqini telep qilghanidi.