Qeshqer konasheherdiki wirus yuqumi dawamliq örlimekte

Muxbirimiz irade
2020-11-05
Share

Qeshqer konasheher nahiyeside bayqalghan tajsiman wirusi yuqumi dawamliq köpeymekte. 5-Noyabir küni xitayning shinxu'a agéntliqi tarqatqan xewiride Uyghur élida 4-noyabir sa'et 0:00 din 24:00 giche yéngidin diyagnoz qoyulghan yuqumlan'ghuchini 8 neper, késellik alamiti bolmighan yuqumlan'ghuchi 2 neper, ularning hemmisi konasheher nahiyeside dep élan qildi.

Xewerde ilgiri sürülüshiche, hazir omumiy éniq diyagnoz qoyulghan wirus yuqumdari 72 neper, alametsiz yuqumdarlar 339 neper bolghan. Alametsiz yuqumdarlarning 324 nepiri qeshqer wilayitidin, 15 nepiri qizilsu oblastida iken.

Xitay hökümitining wirus yuqumi heqqide heqiqiy sanni yoshurushi tüpeylidin wirus yuqumining kéngiyiwatqanliqi melum bolsimu, emma uning heqiqiy kölimi yenila mujimel turmaqta.

Xitayning "Tengritagh xewerler tori" ning xewiridin qarighanda, 1-yanwar küni qeshqerde yuqumning aldini élish-tizginlesh xizmitini yenimu kücheytish toghrisida bir mexsus yighin chaqirilghan bolup bu yighin'gha Uyghur aptonom rayonining partkom sékritari chén chüen'go, xitay döletlik sehiye-saghlamliq komitétining mu'awin mudiri yü shöjünlar qatniship, yuqumni qet'iy kontrol qilishni tekitligen. Ular: "Yuqumning tarqilish yollirini qet'iy üzüp tashlash kérek؛ doxturxana ichide gireleshme yuqumlinish yüz bérishini qet'iy tosush kérek؛ nuqtiliq sorun we nuqtiliq kishiler topida del jayida aldini élishni kücheytish kérek," dégenlerni tekitligen.

Közetküchiler Uyghur élidiki yuqum ehwalining élan qilin'ghandin köp yuqiriliqini texmin qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet