Maykil sobolik: “Qirghinchiliq zor kölemlik qirghinsizmu dawam qiliwatidu!”

Washin'gtondin muxbirimiz eziz teyyarlidi
2024.05.14

Amérika tashqi siyaset kéngishi (AFPC) ning tetqiqatchisi maykil sobolik (Michael Sobolik) ning yéqinda neshrdin chiqqan “Xitayning chong dölet oyunigha taqabil turush” témisidiki namliq esiri “Siyaset sahesidiki herqandaq kishi jezmen oqup chiqishqa tégishlik bir kitab” dep bahalan'ghan idi. Halbuki chet'elliklerning xitayni chüshinishidiki eng ammibab oqushluq, dep qariliwatqan bu eser neshrdin chiqish bilenla xitaylar we xitayperes chet'ellik “Mutexessisler” ning maykil sobolikni nishan qilghan türlük hujumliri tézdin ewj alghan.

Ijtima'iy taratqularni asasliq munber qilghan zeherxendilerche hujumlar ichide beziler maykil sobolikning shexsiyitige a'it töhmetlerni tökme qilghan bolsa, yene beziler uni “Yalghanchi” dep eyibligen. Shular qatarida béyjingdiki “Siyasiy analizchi” andiy mok (Andy Mok) bu heqte toxtilip “Siz éytiwatqan ‛yehudiy zor qirghinchiliqidin buyanqi eng qebih qirghinchiliq‚ning néme ikenliki méni ganggiritip qoyuwatidu. Démisimu qiziq, öltürülgen kishining jesiti bolmaydighan bu qandaq ‛qirghinchiliq‚?” dep so'al qoyghan.

Maykil sobolik bu heqte öz qarashlirini bayan qilip “Xitay hökümiti hazir X (yeni burunqi tiwéttér) ni men'i qilghan turup, bu munberni sehne qilghan halda Uyghur qirghinchiliqini perdazlaydighan yazmilarni bazargha séliwatidu” dégen. Shuningdek birleshken döletler teshkilati (b d t) ning “Qirghinchiliq” heqqidiki tebiride tilgha élin'ghan “Gherezlik halda bir milletni yaki diniy jama'etni toluq yaki qismen halda yoqitishqa urunush, melum bir milletke jismaniy yaki rohiy zexmet yetküzüsh, melum bir milletning tughut nisbitini gherezlik halda cheklesh, melum bir milletke mensup bolghan balilarni a'ile judaliqi wasitiside bashqa bir millet qilip özgertish” qatarliq mezmunlarni eskertidu.

U bu heqtiki qilmishlarning hemmisi Uyghur diyarida körülüwatqanliqini alahide tilgha élish bilen birge “Xitay hazir zor kölemlik adem öltürüshni ishqa ashurmayla ashu xil shekilde qirghinchiliqni dawam qiliwatidu. Bu hazirqi minutlarda xitay kompartiyesining rehberlikide shinjangda dawam qiliwatqan qirghinchiliqtur” deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.