“Qirghinchiliq sayahiti” ning qumul sehnisidiki yéngi teshwiqatlar diqqet qozghidi

Xitay hökümiti yéqinqi yillarda zor küch bilen ijra qiliwatqan “Sayahetchilik arqiliq shinjang heqqidiki hékayilerni yaxshi bayan qilishi” mezmunidiki teshwiqatlar merkiziy sheher bolghan ürümchidin tedrijiy halda bashqa wilayet we sheherlerge kéngiyiwatqanliqi melum. Xitay bashqurushidiki “Xitay xewerliri” torining 21-awghusttiki xewiride qumul wilayitidiki yardang jilghisi nöwette xitay sayahetchilerni mushu xildiki teshwiqatqa jelp qilishning wasitisige aylinip qalghan.

Xewerde éytilishiche, xitayning shendung ölkisidin sella kichik bolghan qumul wilayiti xitay sayahetchilerning Uyghur élidiki ajayip-gharayip tebi'et menzirisidin we kariz yolliridin huzur alidighan muhim seyligahliridin bolup qalghan. Bolupmu yardang tewesidiki qiyaliqlarda kechqurunluqi yultuz körüsh nöwettiki qumul sayahitining eng muhim mezmunliridin bolup, bu ishlargha mensup xitay mutexessislerdin wang jünféng muxbirlargha “Hazir qumul rayoni girimsen asmanda yultuz tamashasi qilishta pütün memliket boyiche eng aldinqi orunda turidighan sayahet ornigha aylandi” dégen.

Xitay mutexessisler izchil “Shinjangning derwazisi” dep qarap kéliwatqan qumul rayoni ötken sekkiz yilda bashqa wilayet we sheherlerdin perqsiz rewishte “Uyghur qirghinchiliqi” dep atalghan basturush we zor kölemlik tutqunni bashtin kechürgen. Shuning bilen birge izchil türde xitayning eng chong kömür qézish baziliridin biri hemde “Gherbning énérgiyesini sherqqe yötkesh” qurulushidiki muhim ötüshme bolghan. Emma xewerde éytilishiche, xitay kompartiyesining qumuldiki mes'ulliridin lyu shöxu'a bu heqte toxtilip “Qumul hazir medeniyet we tarixqa a'it izlarni saqlap qélishta ülge yaratmaqta. Shu arqiliq jungxu'a millitining uzun tarixini namayan qilishqa töhpe qoshmaqta” dégen.

Xewerdin melum bolushiche, 2024-yilining aldinqi yérimida qumul wilayiti sekkiz milyondin köprek sayahetchini kütüwalghan. Emma hazir bu xildiki sayahetlerni teshkillewatqanlar hemde buninggha ishtirak qiliwatqanlarning birdek xitaylar ikenliki, bu xil sayahet pa'aliyetlirining yerlik Uyghurlargha héchqandaq iqtisadiy menpe'et élip kelmeydighanliqi öz-özidin melum, dep qaralmaqta.