Qirghizistanda qirghizlar bilen xitay ishchilar arisida toqunush yüz bergen

Qirghizistanning shimalidiki bir altun kénida shu yerde ishlewatqan xitay kan ishchiliri bilen yerlik qirghiz xelqi arisida toqunush yüz bergen.

Azadliq radiyosining xewiridin qarighanda, 5-awghust küni 500 etrapida yerlik xelq shu jaydiki altun kénini échiwatqan “Jongji” namliq xitay shirkitining kan rayonigha basturup kirip, xitay ishchilar bilen toqunushqan we shirketning bir qanche kiranlirini musadire qilghan.

Qirghizistan sehiye ministirliqining 6-awghust küni bildürüshiche, toqunushta 20 neper xitay ishchisi yarilinip doxturgha apirilghan. Qirghizlar arisidimu bir qanche kishi yarilan'ghan.

Melum bolushiche, yerlik xelq xitaylarning bu yerde kan échip muhitni bulghighanliqi sewebidin at-ulaghlirining tuyuqsiz ölüp kétiwatqanliqini ilgiri sürmektiken. Bu sewebtin qozghalghan naraziliq heriketliri ötken aydila bashlan'ghan bolup, netijide bu naraziliq heriketliri 5-awghust küni toqunushqa aylan'ghan.

Emma yerlik da'iriler xitay shirkiti achqan kanning muhit bulghinishigha seweb bolmighanliqini, su we tupraqta héchqandaq zeherlik madda yaki radi'atsiye bayqalmighanliqini bildürgen.

Qirghizistan mu'awin bash ministiri kubatbék boronof we ichki ishlar ministiri kashkar junushaliyéflar neq meydan'gha yétip bérip, qirghiz namayishchilardin derhal tarqilishni telep qilghan. Emma namayishchi amma buni ret qilip, eger hökümet bu kanlarni bikar qilmisa, özlirining bu yerdiki eslihelerning hemmisini yötkiwétidighanliqini bildürgen.

Qirghizistan bash ministiri muhemmedkaliy abilghaziyéf bolsa yüz bergen toqunush üstide tekshürüsh bashlaydighanliqini bildürüsh bilen birge, yerlik xelqni toqunushni siyasiy mesilige aylanduruwetmeslikke chaqirghan.