Xitay bash ministiri li kéchyang qirghizistandiki ziyariti dawamida bixeterlikni tekitligen

Xitay bash ministiri li kéchyang qirghizistandiki ziyariti mezgilide ottura asiyaning bixeterliki heqqidiki endishisini ipade qilghan. U rayonning bixeterlik weziyitini “Murekkep hem keskin” dep sherhlep, qirghizistan'gha bixeterlik hemkarliqini kücheytish heqqide wede bergen.

Yawro-asiya xewerliri torining bildürüshiche, li kéchyang shangxey hemkarliq teshkilatigha eza döletler bash ministirlirining yighinigha qatnishish üchün qirghizistan'gha barghan bolup, u yuqiridiki sözni mushu yighin jeryanida qilghan. Li kéchyang sözide yene, qirghizistandiki xitay elchixanisigha qilin'ghan bombiliq hujum üstidimu toxtilip, qirghiz hökümitini délo üstidiki tekshürüshini tézlitip, baldurraq xulase chiqirishqa we qirghizistanda xizmet qiliwatqan xitay elchixana xadimlirining bixeterlikige kapaletlik qilishqa chaqirghan.

30-Awghust küni xitay elchixanisigha qarita hujum yüz bérip uzun ötmeyla, qirghiz da'iriliri hujumning Uyghurlargha chétishliq, ikenlikini jakarlighan. Biraq kéyin, qirghizistan tekshürüsh xadimliri bezi qirghizistanliq herbiy we saqchilarningmu xitay elchixanisi uchrighan aptomobil bomba hujumigha chétishliq ikenlikini bayqap, ularning bir qisimlirini wezipisidin élip tashlighan idi. Hazirghiche weqege qirghiz, özbék we rusiye puqraliriningmu chétishliq ikenliki bayqalghan bolsimu, emma bu hujumning qaysi teshkilatning, néme sewebtin qilghanliqi éniqsiz turmaqta.

Yawro-asiya xewerler tori qirghiz da'irilirining weqe heqqide bériwatqan bezi ziddiyetlik uchurlirining guman qozghaydighanliqini ipadilesh bilen birge, xitay hökümitining shangxey hemkarliq teshkilati arqiliq ottura asiya döletliri bilen öz hakimiyitige qarshi chiqiwatqan Uyghurlargha zerbe bérish heriketlirini kücheytiwatqanliqini bildürgen.