Qirghizistanda saqchilar bilen namayishchi amma arisida toqunush yüz bergen

Qirghizistanning qumtor altun kénidiki ishchilarning naraziliq herikiti toqunushqa aylinip, nurghun adem yarilan'ghan. Hökümet terep saqchilar bilen namayishchilar arisidiki toqunushta 50 nechche adem yarilan'ghanliqi, 80 nechche adem qolgha élin'ghanliqini bildürgen.

Qumtor altun kénida partlighan naraziliq herikiti yene jalal'abad shehirige kéngiyip, nechche yüz namayishchi oblast bashliqining ishxanisigha basturup kirgen.

Qumtor altun kéni kanadaning toronto shehiridiki séntérra altunchiliq shirkitining bashqurushida bolup, mezkur kan qirghizistanning asasliq kirim menbelirining biri idi.

Namayishchilar altun kanni dölet ilikige ötküzüwélishni we kan ishchilirining turmush shara'itini yaxshilashni telep qilip, peyshenbe küni namayish qilghan.

Qirghiz axbarati namayishning tereqqiy qilip, jüme küni toqunushqa aylan'ghanliqini xewer qildi. Peyshenbe küni nechche yüz qirghiz namayishchi tamgha yézisidiki tok tarqitish ornigha bésip kirip, kanning tokini üzüp tashlighan.

Jüme küni namayishchilar kan ishxanisigha bésip kirmekchi bolghanda, saqchilar rézinke oq qatarliq qorallarni ishlitip, 2000 dek namayishchini tarqitiwetken. Weziyettin xewerdar kishilerning bildürüshiche, prézidént almasbék atambayéw toqunushning kéngiyip, siyasiy malimanchiliqqa aylinip kétishidin ensirep, derhal jiddiy halet élan qilghan.

Qirghizistan dölet mudapi'e ministirliqi herbiy qisimlarni yötkep kélip, bezi halqiliq orunlarni qoghdaydighanliqini bildürgen. Qirghizistan axbarati, jala'abdtiki malimanchiliqni hökümetke qarshi bezi küchler uyushturghan bolushi éhtimal, dep guman qilghan.