Qirghizistanning mu'awin ichki ishlar ministiri Uyghur élide xitay bilen térrorluqqa qarshi hemkarliq kélishimi imzalighan

Yéqinda qirghizistanning mu'awin ichki ishlar ministiri öktebir ormambétof bashchiliqidiki bir wekiller ömiki Uyghur élige bérip, rayondiki xitay dölet xewpsizliki emeldarliri bilen ikki döletning “Chégra liniyesidiki qirghizistan saqchilirigha teshkiliy terbiyelesh” élip bérish toghrisida kélishim imzalighan. “Yawro-asiya tori” ning 7-iyul bergen xewiride ashkarilishiche, qirghizistan ichki ishlar ministirliqi wekiller ömikining Uyghur élidiki ziyariti 19-iyundin 23-iyun'ghiche élip bérilghan iken. Xewerde, ziyaret jeryanida xitay dölet xewpsizliki da'irilirining qirghizistan ziyaret ömikidikilerge ammiwi topilangni kontrol qilish we “Térrorluq” ni basturush toghrisida mexsus léksiye bergenliki tilgha élin'ghan.

Qirghizistan ichki ishlar ministirliqi wekiller ömikining bu ziyaritining qirghizistan pirézidénti sadir japparofning bu yil 5-ayda shi'endiki xitay-ottura asiya dölet bashliqliri yighinigha qatniship, xitayning “Shinjang siyasiti” ni qollaydighanliqi؛ “Sherqiy türkistan térrorluq küchliri” ge zerbe béridighanliqini wede qilishining arqisidin élip bérilishi, diqqet qozghidi. Melum bolushiche, pirézidént japparof shi'en yighini mezgilide shi jinping bilen imzalighan qoshma axbaratida “Sherqiy türkistan küchliri” ge zerbe béridighanliqini wede qilghan birdin-bir ottura asiya döliti rehbiri iken. “Yawro-asiya tori” ning xewiride éytilishiche, ziyaret mezgilide qirghizistan terep xitay da'iriliridin “Téximu ünümlük nazaret döliti qurush toghrisida meslihetke érishken.”

Qirghizistan ichki ishlar ministirliqining bu heqtiki bayanatida, qirghizistan dölet xewpsizlik emeldarlirining “Xitay saqchilirining reqemlishish jehettiki yéngi muweppeqiyetlirini öginish, saqchilarning xizmette ademsiz uchqu (dron) ishlitish tejribisi bilen tonushush we diniy ashqunluqqa qarshi turush usullirini öginish pursiti bolghanliqi” bildürülgen. Bu ziyaret gherb döletliri, xelq'araliq kishilik hoquq teshkilatliri we chet eldiki Uyghurlar, bashqa döletlerni xitayning rayondiki Uyghurlargha yürgüzüwatqan irqiy qirghinchiliqini toxtitish üchün emeliy tedbirlerni élishqa chaqiriwatqan bir waqitta élip bérilghan.