Qirghizistan “Uyghur ittipaqi jem'iyiti” ning re'isi qolgha élin'ghan

Qirghizistan “Uyghur ittipaqi jem'iyiti” ning re'isi, bishkektiki “Medine baziri” ning xojayini, qirghizistan parlaménti yuqiri kéngishining sabiq ezasi tursuntay selimof 9-öktebir küni qirghizistan da'iriliri teripidin qolgha élin'ghan. Tursuntay selimofning 7-öktebir küni qirghizistan dölet bixeterlik komitéti xadimliri teripidin tutqun qilinip, 9-öktebir küni bishkekning pérwomayiskiy rayonluq sot mehkimisige chiqirilghanliqi we sotning uni bu yil 9-dékabir küni kéyinki basquchluq soti échilghuche türmide tutup turushni qarar qilghanliqi bildürülmekte. Tursuntay selimofning tuyuqsiz qolgha élishini muhajirettiki Uyghurlarning alahide diqqiti we endishini qozghidi. Tursuntay selimofning téxi bu yil 3-ayda qirghizistan Uyghurlirining birdin-bir qanunluq ammiwi teshkilati bolghan “Uyghur ittipaq jem'iyiti” ning re'islikige saylinip 6 aydin kéyin tuyuqsiz qolgha élinishi diqqet qozghimaqta.

Lékin qirghizistan dölet bixeterlik komitétining 10-öktebir élan qilghan bayanatida qeyt qilinishiche, tursuntay selimof qirghizistan jinayi ishlar qanunining 261-maddisi boyiche “Teshkillik guruh qurush yaki uninggha qatnishish” bilen eyiblinip qolgha élin'ghan. Da'iriler tursuntay selimofni qolgha élishta uni 4-öktebir küni qirghizistan dölet bixeterlik komitéti xadimliri bilen bolghan toqunushta étip öltürülgen qirghizistandiki dangliq “Qara qollar guruhi” ning atamani qamchibék kolbayéfqa chatqan.

Lékin tursuntay selimof 9-öktebir bishkek pérwomayiskiy rayonluq sot mehkimisige chiqirilghanda uninggha artilghan barliq eyibleshlerni ret qilghan. Tursuntay selimof, özining qamchibék kolbayéf bilen bir mehellide qoshna olturidighanliqi, qamchibékni körgenliki, emma uning bilen herqandaq shekildiki bir munasiwiti yoqlighini éytqan. Tursuntay salimofning körsitishiche, uning qamchibék kolbayéf bilen “Héchqandaq bir ortaq nuqtisi yoq” iken. Nöwette, tursuntay selimofning xitay-qirghizistan munasiwiti téximu chongqurlashqan, shangxey hemkarliq teshkilati bash ministirlirining yighini 26-öktebir küni bishkek sheheride ötküzülidighan, shundaqla xelq'ara jem'iyetning diqqiti Uyghur mesilisidin xamasning isra'iliyege qoralliq hujum qilish weqesige buralghan bir peytte qolgha élinishi diqqet qozghimaqta.