Xitay ma'arip ministirliqi qirghizistanda xitayche ma'aripni yolgha qoyush türi boyiche ish bashlighan

Xitayning shinxu'a agéntliqi tarqatqan bir xewerdin qarighanda xitay ma'arip ministirliqining “Xitay ma'arip bayliq qurulushi we xitay medeniyet alaqe türi” yéqinda qirghizistanda ish bashlighan.

Bu qurulush türi boyiche qirghizistanda xitay ma'aripini shekillendürüp uni yerlikleshtürüsh pilani yolgha qoyulidighan bolup, oqush basquchi bashlan'ghuch mektep, toluqsiz we toluq ottura mektep we uniwérsitétning barliq basquchlirini öz ichige alidiken.

Xewerde, bu türning qirghizistan'gha olturaqlashqan xitay muhajirliri we ularning ewladlirini nishan qilghanliqi we bu türni yolgha qoyushta shu yerdiki her qaysi xitay muhajirlar teshkilatlirining yéqindin hemkarlashqanliqi bayan qilin'ghan. Uningda yene, qirghizistan döletlik uniwérsitéti kungzi institutining xitay mudiri chén jiguning sözi neqil qilinip, xitay medeniyet alaqe türining terbiyelesh endizisini yolgha qoyushning ehmiyiti we uning chet'ellerde chong boluwatqan xitay ewladlirini ela süpetlik ma'arip bilen terbiyelesh we xitay tili ögitishtiki roli medhiyelen'gen.

Xitay ma'arip ministirliqining qirghizistandiki bu qurulushini Uyghur élidiki “Shinjang pédagogika uniwérsitéti” üstige alghaniken.

Yéqinqi yillarda amérika we bashqa gherb elliride xitayning kungzi instituti we shuningdek yene atalmish xitay muhajirlar teshkilatlirining xitay hökümitining tesir körsitish wasitisi süpitide heriket qiliwatqanliqi keng ashkarilinip kungzi inistitutlirining pa'aliyetliri diqqet qozghashqa bashlighanidi.

Amérika awazining xewer qilishiche, hazirghiche amérikada ilgiri bar bolghan 118 kungzi institutining 104 i taqalghan.

Emma xitayning ottura asiya döletliride kungzi institutliri we shuningdek her xil namlar astidiki tesir körsitish herikitini dawamliq kéngeytiwatqanliqi ashkarilanmaqta.