Uyghur diyaridiki mekteplerning bu yilliq birinchi sa'etlik dersi “Qizil léksiye” bilen bashlan'ghan

• Muxbirimiz nur'iman
  2021-09-02

“Tengritagh” torining xewirige qarighanda, Uyghur rayonidiki ottura-bashlan'ghuch mektepler 1-sétebir küni oqush bashlighan. Xewerde déyilishiche, yéngi oqush yili bashlan'ghan birinchi küni Uyghur rayonidiki barliq mektepler birinchi sa'etlik dersini “Partiye tarixi” ni öginish we “Qizil gén'gha warisliq qilish” mezmun qilin'ghan qizil teshwiqat programmisi bilen bashlighan. Bashlan'ghuch-ottura mekteplerdiki oqughuchilar shu küni kompartiyeni mediyihlesh témisidiki resim körgezmisini körüshke orunlashturulghan. Kuchadiki 10-ottura mektep oqush bashlighan küni “Qizil gén'gha warisliq qilish” pa'aliyiti ötküzgen.

Közetküchilerning ilgiri sürüshiche, yéqindin buyan pütkül xitay miqyasida “Ménge yuyush” xaraktérliq “Idé'ologiye özgertish herikiti” qozghalghan. Bu heriket Uyghur rayoni, tibet qatarliq chégra rayonlarda téximu esheddiy shekilde dawamlashqan. Bolupmu Uyghur rayonida Uyghurlarni asas qilghan yerlik millet oqughuchilirigha atalmish “Jungxu'a milliti ortaq éngi” terbiyesi we “Qizil gén'gha warisliq qilish” tin ibaret ashqun kommunist idé'ologiyesi téngilip, ularning milliy kimlikini yoq qilish istratégiyesi ijra qilinishqa bashlighan.

Tetqiqatchi adriyan zénzning “Iqtisadshunas” zhurnilida élan qin'ghan maqaliside körsitilishiche, qeshqer wilayiti we yerken nahiyeside 2019-yilining axirighiche 880,500 balining yataqliq mektepke orunlashturulghanliqi tilgha élin'ghan. Igilinishiche, yataqliq mektepler da'irilerning 24 sa'etlik kontrolluqi astidiki lagér tüsini alghan mektepler bolup, xitay da'irilirining nöwette pütün küchi bilen Uyghur perzentlirige “Ménge yuyush” terbiyesi élip bériwatqanliqi, kelgüside ularni öz ejdatlirigha oxshimaydighan pütünley bashqiche bir ewlad qilip chiqishni pilanlawatqanliqi ilgiri sürülmekte.