Xitay rusiyede “Qizil sayahet” ni ewj aldurmaqta

“Wal sitrét zhurnili” ning 31-öktebirdiki xewiride éytilishiche, xitay bilen rusiye otturisidiki munasiwetning qaysi derijide yéqinlishiwatqanliqini, xitay hökümiti zor küch bilen teshebbus qiliwatqan “Qizil sayahet” pa'aliyitige awaz qoshup, rusiyege sayahet üchün kéliwatqan xitay puqralirining san jehettiki éship méngish ehwalidin ochuq körüwélish mumkin iken.

Melum bolushiche, shi jinping textke chiqqandin kéyin xitay kompartiyisige alaqidar tarixiy nuqtilarni sayahet qilish ewj alghan. Bu hal 2015-yili maw zédungning tughulghan yurti bolghan shawshen nahiyiside xitay-rusiye ikki terep “Qizil sayahet” yollirini échish heqqidiki resmiy toxtamgha qol qoyghandin kéyin téximu yuqiri pellige kötürülgen. Sayahet ömeklirige wizini kechürüm qilish, erzan mal bahasi we bixeter sayahet muhiti köpligen xitay sayahetchilerni “Qizil sayahet” ke jelp qilghan qoshumche amillar iken.

Bu yilning özide bolsa mushu layihe boyiche bir milyon yüz ming xitay sayahetchi rusiyediki “Qizil” nuqtilarni sayahet qilishqa kelgen. Chéng ling isimlik bir xitay muxbirgha “Biz lénin we stalin heqqide melumatlargha ige bolduq, shundaqla ularning bu döletni qandaq qilip qurup chiqqanliqini chüshenduq” dégen.

Melum bolushiche, 2017-yili “Rusiye öktebir inqilabi” ning yüz yilliqi tebriklinidighan bolup, bu mezgilde téximu köp xitay sayahetchilerning rusiyege bérishi mölcherlenmekte iken.