Қизилсу области «қара күчләр вә рәзилликкә четишлиқ җинайи қилмишлар» ни паш қилиш һәмдә мукапатлаш чарисини елан қилған

Мухбиримиз сада
2019-05-15
Елхәт
Пикир
Share
Принт

Қизилсу областлиқ даириләр йеқинда «қара күчләр вә рәзилликкә четишлиқ» җинайи қилмишларни паш қилиш һәмдә мукапатлаш чарисини елан қилған.

Қизилсу областлиқ һөкүмәт торида елан қилинған бу «чарә» дә түрлүк мукапатлаш усуллирини қоллинип, аммини «қара күчләр вә рәзилликкә четишлиқ җинайи қилмишлар» ни актиплиқ билән паш қилишқа сәпәрвәр қилған.

Мәлум болушичә, «қара күчләр вә рәзилликкә четишлиқ җинайи қилмишлар» 12 түрни өз ичигә алған болуп, буниңдики әң диққәт тартидиған биринчи нуқта милләт вә дин мәсилисигә тақалған. Мәзкур «мукапатлаш чариси» ниң биринчи түридә «милләт, динни ‹ниқаб' қиливелип, муштумзорлуқ қилған, йеза-кәнтләрниң сайлимиға арилишивалған, қанунсиз вәз-тәблиғ ейтқан, әсәбий идийәләрни тәрғиб қилған, диний әсәбий қилмишлар билән шуғулланған җинайәт шайкилири» ни паш қилиш тәләп қилинған.

Нөвәттә хитай даирилири қозғиған «қара күчләргә зәрбә бериш вә рәзилликни түгитиш» долқуни уйғур диярида кишиләрни «мәсилә тапшуруш» қа яки «мәсилә паш қилиш» қа мәҗбурлаштәк кәң көләмлик һәрикәткә айлинип, хәлқарадики кишилик һоқуқ тәшкилатлириниң әндишиси қозғимақта.

Хитайниң районда милләт вә диний мәсилигә мунасивәтлик ишларни «қара күчләр вә рәзилликкә четишлиқ» җинайи қилмишниң бир түригә айландуруши көзәткүчиләрниң техиму диққитини қозғимақта. Улар бу хитай һөкүмитиниң техиму көп уйғурларға қамақ җазаси бериш яки уларни коллектип һалда лагерларға солаш мәқситигә бир баһанә болуши мумкин дәп қаримақта.

Корла шәһәрлик һөкүмәт ториниң хәвиригә қариғанда, 15-май корла шәһиридин икки нәпәр киши «қара күчләр вә рәзилликкә четишлиқ җинайи қилмишларниң йип учини тәминлигән» лики үчүн 30 миң йүән билән мукапатланған.

Пикирләр (0)
Share
Толуқ бәт