Коммунист хитайниң қизил тәшвиқати қандақ болуп "мәдәний озуқ" болуп қалди?

Мухбиримиз җәвлан
2021-04-20
Share

Хитай таратқулиридин мәлум болушичә, ақсуда 16-апрелдин башлап "мән җеҗяңни-шинҗаңни сөйимән: мәдәнийәт билән озуқландурулған 100 йил" темисида "милйон йүрүшлүк паалийәт" башланған. Хитайниң пилани бойичә, җеҗяң өлкиси ақсуға ярдәм беридиған өлкә болуп, "җеҗяң билән ақсу партийә қурулғанлиқиниң 100 йиллиқини ортақ тәбрикләш" бу паалийәтниң баш темиси болидикән, паалийәттә хитай компартийәсини күйләйдиған қизил нахша-усуллар, тиятир, фото сүрәт көргәзмиси өткүзүлидикән.

Бу хәвәрдә ейтилған "милйон йүрүшлүк паалийәт" баш темиси қизил болған 100 мәйдан тиятир қоюш, 100 мәйдан тиятирни мәктәпләрдә көрситиш, партийә тарихиға аит 100 парчә сүрәт вә архип көргәзмиси өткүзүш, 100 мәйдан нахша кечилики өткүзүш, 100 мәйдан лексийә уюштуруш, 100 нәпәр қизил сәнәтчи тәрбийәләш қатарлиқ 11 түрлүк паалийәтни өз ичигә алған болуп, бу арқилиқ "шинҗаңни мәдәнийәт билән озуқландуруштики 10 чоң үлгә қурулушиниң чоңқурлишиши вә әмәлийлишиши" илгири сүрүлидикән.

Анализчиларниң қаришичә, уйғур районида ислам мәдәнийити асасида шәкилләнгән миллий аң вә турмуш шәкли хитай һөкүмити үчүн ейтқанда "кесәл аң вә ғәйрий турмуш адити" болуп, хитай уни йоқитип бир йәргә барғанда униң орнини толдуруш үчүн алиқачан түкүрүп ташланған коммунизм сәпсәтисини қайта пәйда қилип, хәлқниң меңисини солчил идийә билән ююп, уларни өз миллитини вә алаһидиликини унтуған бир топ маңқуртларға айландурушқа урунмақта икән. Коммунсит хитайниң бу бимәнә сәпсәтилири "мәдәний озуқ" әмәс, бәлки мәдәнийәт маркиси чапланған "қизил зәһәр" болуп, хитай һөкүмити уйғур хәлқигә буни зорлап теңиш арқилиқ бу хәлқни өзи халиған типтики аңсиз, җансиз, коммунсит хитайниң сизиқидин чиқмайдиған кишиләргә айландурмақчи болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт