Kommunist xitayning qizil teshwiqati qandaq bolup "Medeniy ozuq" bolup qaldi?

Muxbirimiz jewlan
2021-04-20
Share

Xitay taratquliridin melum bolushiche, aqsuda 16-apréldin bashlap "Men jéjyangni-shinjangni söyimen: medeniyet bilen ozuqlandurulghan 100 yil" témisida "Milyon yürüshlük pa'aliyet" bashlan'ghan. Xitayning pilani boyiche, jéjyang ölkisi aqsugha yardem béridighan ölke bolup, "Jéjyang bilen aqsu partiye qurulghanliqining 100 yilliqini ortaq tebriklesh" bu pa'aliyetning bash témisi bolidiken, pa'aliyette xitay kompartiyesini küyleydighan qizil naxsha-usullar, tiyatir, foto süret körgezmisi ötküzülidiken.

Bu xewerde éytilghan "Milyon yürüshlük pa'aliyet" bash témisi qizil bolghan 100 meydan tiyatir qoyush, 100 meydan tiyatirni mekteplerde körsitish, partiye tarixigha a'it 100 parche süret we arxip körgezmisi ötküzüsh, 100 meydan naxsha kéchiliki ötküzüsh, 100 meydan léksiye uyushturush, 100 neper qizil sen'etchi terbiyelesh qatarliq 11 türlük pa'aliyetni öz ichige alghan bolup, bu arqiliq "Shinjangni medeniyet bilen ozuqlandurushtiki 10 chong ülge qurulushining chongqurlishishi we emeliylishishi" ilgiri sürülidiken.

Analizchilarning qarishiche, Uyghur rayonida islam medeniyiti asasida shekillen'gen milliy ang we turmush shekli xitay hökümiti üchün éytqanda "Késel ang we gheyriy turmush aditi" bolup, xitay uni yoqitip bir yerge barghanda uning ornini toldurush üchün aliqachan tükürüp tashlan'ghan kommunizm sepsetisini qayta peyda qilip, xelqning méngisini solchil idiye bilen yuyup, ularni öz millitini we alahidilikini untughan bir top mangqurtlargha aylandurushqa urunmaqta iken. Kommunsit xitayning bu bimene sepsetiliri "Medeniy ozuq" emes, belki medeniyet markisi chaplan'ghan "Qizil zeher" bolup, xitay hökümiti Uyghur xelqige buni zorlap téngish arqiliq bu xelqni özi xalighan tiptiki angsiz, jansiz, kommunsit xitayning siziqidin chiqmaydighan kishilerge aylandurmaqchi bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet