D u q bayanatchisi da'irilerning Uyghur déhqanlirini qizil teshwiqatqa uyushturushni tenqidlidi

Yéqindin buyan xitay hökümet taratqulirida, Uyghur déhqanlirining her xil namlardiki qizil teshwiqat pa'aliyetlirige uyushturulghanliqi heqqidiki xewerlerning köpiyishi weziyet analizchilirining diqqitini qozghap, chet'ellerdiki Uyghur teshkilatliri we siyasiy pa'aliyetchilirining tenqidige uchridi.

Xitayning tengritagh torida “7-May küni awat nahiyesining besh'ériq bazirida üch chaqliq motsiklit heydigen 1000 gha yéqin déhqanning bazar tewesidiki hemme kentke bérip, milletler ittipaqliqi teshwiqati élip barghan” liqi heqqidiki süretlik xewer bésildi. Xewerde yene bu atalmish “Qizil teshwiqat motsiklit” igha xitay dölet bayriqi qadalghanliqi, bir teripige xitay kattiwashlirining resimi, yene bir teripige qizil teshwiqat sho'arliri yézilghanliqi tilgha élinip, mezkur motsiklitining awat nahiyesining besh'ériq baziridiki déhqan partiye ezasi tömür qadir teripidin yasalghanliqi hem nahiyilik hökümetning pul chiqirishi bilen bu xil motsiklitlardin 1000 dane yasilip, yézidiki déhqanlar seperwer qilinip, milletler ittipaqi teshwiqati élip bérilghanliqi tilgha élin'ghan.

Dunya Uyghur qurultiyi bayanatchisi dilshat rishit ependi : “Xelq'arada bu xil heriketler ‛medeniyet inqilabi dewridiki qizil teshwiqat, ménge yuyush‚ dep teripliniwatqan bolsimu, emma da'iriler bu usul arqiliq Uyghurlargha qaritilghan siyasiy zulumning üstige yene éghir meniwi zulumlarni qoshmaqta. Buning aqiwiti Uyghurlarning naraziliqi we nepritini téximu kücheytip, rayon weziyitini téximu keskinleshtürüshi mumkin.” dédi.