Uyghur rayonidiki j x tarmaqliri 20 türlük “Qulayliq tedbir” ni otturigha qoyghan

• Muxbirimiz jewlan
  2021-08-04

“Tengritagh tori” we “Shinjang géziti” ning 4-awghust chiqarghan xewirige qarighanda, Uyghur aptonom rayonluq jama'et xewpsizlik tarmaqliri “Men ammigha emeliy ish qilip bérimen” dégen témida axbarat élan qilish yighini ötküzgen. Yighinda j x orunliri özlirining tekshürüp tetqiq qilishliri we uniwérsal xulase-höküm chiqirishliri asasida “Ammigha qulayliq yaritip, karxanilargha menpe'et yetküzidighan” 20 türlük tedbirni otturigha qoyghan. Bu tedbirler jem'iyet amanliqi, qatnash, chégradin kirip-chiqish qatarliq sahelerge chétilidiken.

Bu tedbirler ichide, ige-chaqisi yoq qérilargha étibar bérip, ishik aldigha bérip nopus we kimlik béjirish, uchurlirini kompyutérgha kirgüzüshke yardem bérish, torda nopus resmiyiti béjirish qatarliqlar alahide tonushturulghan. Nöwette Uyghur rayonidiki her qaysi nahiye (sheher) lerge köchüp kirgen nopuslarning we yötkelgen nopuslarning resmiyitini torda béjirish omumlashqan bolup, 2021-yildin buyan 600 mingdin köp nopus torda béjirilgen.

Uningdin bashqa, Uyghur rayonidiki j x orunliri oqush püttürgen oqughuchilarning her türlük nopus resmiyitini béjirish, ölke atlap nopus béjirish, kimliki yütkenlerge kimlik toluqlap bérish qatarliq ishlarni tor arqiliq béjiriwatqan bolup, jay atlap nopus resmiyitini béjirgili kelgenler özining esli olturushluq makanigha qaytip resmiyet béjirmisimu bolidighan halet shekillen'gen.

Közetküchilerning qarishigha asaslan'ghanda, xitayning nopus siyasiti ezeldin ching bolup kelgen, emma Uyghur rayonidiki nopus resmiyetlirining bundaq asanlashturulushi ichkiridin kélidighan xitay aqqunliri we ichkiridin ish izdep kelgen xitay oqughuchilirigha qulayliq yaritip béridiken. Xitay j x orunlirining “Ammigha qulayliq” dep yolgha qoyghanliri emeliyette xitay puqralirigha asanliq yaritish, ularni Uyghur rayonigha köplep jelp qilish üchün tüzülgen tedbirlerdur. Uyghurlar üchün bolsa ularni bashqurush, kontrol qilish chariliridin bashqa nerse emestur. Xitay j x orunlirining 2014-yilliri Uyghurlargha pasport béjirishni asanlashturup, arqidin ularni yighiwélip lagérgha qamighanliqi buning ispatidur. Hazir bolsa Uyghurlarning pasport béjirip chet'ellerge chiqishi, chet'ellerdiki uruq-tughqanliri bilen jem bolushini pütünley kontrol qilghan.