Uyghur aptonom rayonidiki ottura, bashlan'ghuch mekteplerde “Qosh tilliq ma'arip” ning qaplash nisbiti 70% ke yetken

Uyghur aptonom rayonluq ma'arip nazariti bügün rayondiki “Qosh tilliq ma'arip” heqqide bayanat élan qilip, atalmish “Qosh tilliq ma'arip” terbiyesi éliwatqan oqughuchilarning 2 milyondin ashqanliqini, yeslilerdiki “Qosh tilliq terbiye” ning omumlishish nisbitining 90% ke yéqinlashqanliqini, bashlan'ghuch, ottura mekteplerde “Qosh tilliq ma'arip” ning qaplash nisbitining 70% ke yetkenlikini élan qilghan.

Tengritagh torining xewirige qarighanda, xitay merkiziy hökümiti 2010-yilidiki “Shinjang xizmiti yighini” da “Qosh tilliq ma'arip” ni dölet istratégiyesi derijisige kötürgen hemde “Qosh tilliq ma'arip” ni Uyghur élining jenubidiki 3 wilayet, bir oblastqa shiddet bilen omumlashturghan.

Melum bolushiche, 2015-yiligha kelgende, Uyghur aptonom rayonidiki bashlan'ghuch, ottura mekteplerde “Qosh tilliq ma'arip” terbiyesi éliwatqanlar we xitay siniplirida ariliship oquwatqanlar 2 milyon 240 mingdin éship, yerlik millet oqughuchilirining 77% ni teshkil qilghan.

Uyghur aptonom rayonluq ma'arip nazariti mezkur bayanatta yene buningdin kéyinki ma'arip xizmitining asasliq mélodiyesining dawamliq “Qosh tilliq ma'arip” bolidighanliqini, her derijilik hökümetlerning “Qosh tilliq ma'arip” sahesige pütün küchi bilen meblegh salidighanliqini bildürgen.

Közetküchiler, xitay hökümitining yéqinqi 10 yil mabeynide namda “Qosh tilliq ma'arip” déyiliwatqan, emeliyette xitay tilini asas qilghan “Yekke tilliq ma'arip” ning Uyghur élida tarixtin buyan dawamliship kelgen Uyghur tilidiki milliy ma'aripni peydin-pey siqip chiqiriwatqanliqidin qattiq endishilenmekte.