“Qosh tilliq” yeslilerni omumlashturushta xoten we qeshqer asas qilin'ghan

Uyghur aptonom rayoni ma'arip da'iriliri 2017-yili Uyghur diyari boyiche yéngidin we kéngeytip qurulidighan 4387 qosh til yeslisining her qaysi jaylardiki qurulush xizmetlirining bashlan'ghanliqini bildürgen.

“Shinjang iqtisad géziti”ning xewiridin ashkarilinishiche, Uyghur aptonom rayonluq ma'arip nazariti mexsus besh tekshürüsh we nazaret qilish guruppisini turpan, qeshqer, xoten, ili we bashqa wilayetlerge ewetip, yeslilerning qurulush ehwali hem bashqa munasiwetlik ehwallar üstidin tekshürüsh élip barghan.

Xewerdin ashkarilinishiche, üch yilliq heqsiz oqutulidighan qosh tilliq yeslilerni kéngeytip qurush we yéngidin qurushta Uyghur diyarining jenubi, yeni nopus jehette Uyghurlar zich we eng köp olturaqlashqan nahiye hem yéza-kentler asasiy nishan qilin'ghan. Bolupmu, üch yilliq heqsiz qosh tilliq ma'aripini omumlashturushta xoten wilayiti deslepki nishan qilin'ghan iken.

Hazir xoten wilayitide 480 qosh tilliq yesli mewjut bolup, qosh tilliq yeslilerning omumi sani bu yil 9-ayghiche 1000gha yetküzülidiken we buningda 244 ming bala oqutulidiken.

Qeshqer wilayitimu qosh tilliq yeslilerni omumlashturushtiki asasliq nishanliq jay bolup, bu yil qeshqer wilayitide 1152 qosh tilliq yesli yéngidin qurulidiken.

Emma da'iriler qosh tilliq yeslilerni qurushta meblegh bilen oqutquchi mesilisi mewjutluqini körsetken.

Nöwette, her qaysi jaylarda qosh tilliq yeslilerge oqutquchi qobul qilish bashlan'ghan bolup, oqutquchi qobul qilishta hetta Uyghur tilini bilmeydighan xitay oqutquchilarningmu köplep qobul qilinidighanliqi inkas qilinmaqta.

Bir qisim Uyghur oqutquchilarning inkasliridin melum bolushiche, qosh tili ma'aripi emeliyette peqet xitay tilini asas qilghan yekke tilliq ma'ariptin ibaret bolup, Uyghur perzentlirini yeslidin tartip xitay tilida terbiyilesh meqset qilin'ghan. Amérikidiki Uyghur kishilik hoquq layihisi we dunya Uyghur qurultiyimu bu heqte bayanatlarni élan qilip, xitay hökümitini Uyghurlarning öz tilidiki milliy ma'aripigha ehmiyet bérishke, Uyghur tilidiki aliy ma'aripni eslige keltürüshke chaqirip kelmekte.