Uyghur rayon da'iriliri "Qosh tilliq yesliler" ni köpeytishni qarar qildi

Muxbirimiz ümidwar
2016-11-30
Share

Uyghur aptonom rayonluq ma'arip nazariti da'iriliri Uyghur diyaridiki Uyghur qatarliq xitay bolmighan millet balilirini yeslidin bashlap xitay tilida terbiyileshni meqset qilghan qosh tilliq yeslilerni kéngeytish we téximu köpeytishni qarar qilghan.

28-Noyabir küni ma'arip nazariti we hökümet birliship achqan yighinda, Uyghur diyarining yéza, kentliridiki, bolupmu nuqtiliq halda jenubtiki qeshqer, aqsu, xoten, qizilsu qatarliq wilayet we oblastlardiki üch yilliq heqsiz qosh tilliq yesli ma'aripini téximu omumlashturush tekitlinish bilen bir waqitta yene, 2017-yili pütün rayondiki qosh tilliq yeslilerning sanini 4387 ge, Uyghur diyarining jenubidiki qosh tilliq yeslilerni 3223 ke yetküzüsh qarar qilin'ghan.

Shundaq bolghanda, aqsu, qeshqer, xoten, qizilsu qatarliq rayonlardiki qosh tilliq yesliler pütün Uyghur diyaridiki qosh tilliq yesliler nisbitining 74% ni igileydiken.

Da'iriler yene, 2017-yili pütün Uyghur diyari boyiche qosh tilliq yeslilerge bir milyon 120mingdin artuq balini qobul qilish, buning ichide 770 minggha yéqin balining Uyghur diyarining jenubidiki üch wilayet we bir oblasttiki yéza, kentlerdin bolushi kéreklikini belgiligen.

Melumki, jenubiy wilayetlerdiki yéza, qishlaq ahalisining mutleq köp qismini Uyghurlar teshkil qilidu.

Dunya Uyghur qurultiyining bayanatlirida körsitilishiche, xitay kücheytip yürgüzüwatqan qosh tilliq ma'arip, yeni qosh tilliq yesli ma'aripi emeliyette peqet yekke tilliq, yeni xitay tilliq ma'ariptin ibaret bolup, bu, Uyghur diyarida tarixtin buyan dawamliship kéliwatqan Uyghur tili ma'aripini cheklep, Uyghur perzentlirini kichik waqtidin tartip xitay tilida we xitay medeniyitide terbiyilep, ularni öz milliy til, yéziqi we medeniyitidin yiraqlashturushni meqset qilidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet