Uyghur élida bir milyon 600 ming Uyghur a'ilisi yéngi “Tughqan” liri bilen “Tughqanlashturulghan”
Xitay hökümiti Uyghur aptonom aptonom rayonida milletler ara “Tughqanlashturush” siyasiti yolgha qoyghan yéqinqi bir yérim yil ichide bir milyon 600 ming Uyghur a'ilisige mejburiy “Tughqan” tépip bérilgen.
-
Muxbirimiz erkin
2018-07-04 -
-
-
Xitay hökümiti Uyghur aptonom aptonom rayonida milletler ara “Tughqanlashturush” siyasiti yolgha qoyghan yéqinqi bir yérim yil ichide bir milyon 600 ming Uyghur a'ilisige mejburiy “Tughqan” tépip bérilgen.
Uyghur aptonom rayonluq partkom 2016-yili 10-aydin bashlap rayondiki her millet ammisining öz ara mejburiy “Tughqanchiliq” ornitish herikitini bashlap, Uyghur a'ililirini xitay kadirlar, kespiy xadimlar we ishchi-xizmetchiler bilen “Tughqanlishish” qa mejburlighan.
Halbuki, bu heriket xelq'ara kishilik hoquq organlirining qattiq eyiblishige uchrap, mejburiy élip bérilghan bu heriketning Uyghurlarning normal a'ile hayatigha, kündilik turmushigha we shexsi mexpiyetlikige éghir parakendichilik élip kelgenliki ilgiri sürülgen idi.
Uyghur teshkilatliri bu heriketning Uyghurlarni kontrol qilishni, ularning a'ile ichidiki shexsiy pa'aliyetlirini nazaret qilishni meqset qilghanliqini ilgiri sürüp keldi. Xitayda chiqidighan “Xelq géziti” ning xewiride ashkarilinishiche, mezkur heriket bashlan'ghan 2016-yili 10-aydin béri Uyghur aptonom rayoni miqyasida bir milyon 100 ming her derijilik kadir, ishchi-xizmetchi töwen'ge chüshürülüp, bir milyon 600 ming yerlik a'ile bilen “Tughqanchiliq” ornitilghan. “Xelq géziti” ning xewiride yene qeyt qilinishiche, bir milyon 100 ming kadir we ishchi-xizmetchi bu mezgil ichide atalmish yerlik “Tughqanliri” ni 33 milyon 300 ming qétim yoqlap barghan. Bu her 20 nechche künde bir qétim kélip “Tughqan yoqlash” qa toghra kélidiken.
Mezkur heriket chén chüen'go Uyghur aptonom rayonigha yötkep kélinip 2 aydin kéyin, yeni keng kölemlik “Yighiwélish lagérliri” qurulup, bir milyondin artuq Uyghur bu lagérlargha solinishtin sel burunla bashlan'ghan. Yéqinda amérikining xelq'ara diniy ishlar bash elchisi sam browénbek aqsaraygha “Yer shari magnitiskiy kishilik hoquq qanuni” ni ishqa sélip, chén chüen'goning Uyghur élida élip barghan insaniyetke qarshi qilmishlirini jazalashni telep qilghan idi.