Уйғур елида бир милйон 600 миң уйғур аилиси йеңи “туғқан” лири билән “туғқанлаштурулған”

Мухбиримиз әркин
2018-07-04
Share

Хитай һөкүмити уйғур аптоном аптоном районида милләтләр ара “туғқанлаштуруш” сиясити йолға қойған йеқинқи бир йерим йил ичидә бир милйон 600 миң уйғур аилисигә мәҗбурий “туғқан” тепип берилгән.

Уйғур аптоном районлуқ партком 2016‏-йили 10‏-айдин башлап райондики һәр милләт аммисиниң өз ара мәҗбурий “туғқанчилиқ” орнитиш һәрикитини башлап, уйғур аилилирини хитай кадирлар, кәспий хадимлар вә ишчи-хизмәтчиләр билән “туғқанлишиш” қа мәҗбурлиған.

Һалбуки, бу һәрикәт хәлқара кишилик һоқуқ органлириниң қаттиқ әйиблишигә учрап, мәҗбурий елип берилған бу һәрикәтниң уйғурларниң нормал аилә һаятиға, күндилик турмушиға вә шәхси мәхпийәтликигә еғир паракәндичилик елип кәлгәнлики илгири сүрүлгән иди.

Уйғур тәшкилатлири бу һәрикәтниң уйғурларни контрол қилишни, уларниң аилә ичидики шәхсий паалийәтлирини назарәт қилишни мәқсәт қилғанлиқини илгири сүрүп кәлди. Хитайда чиқидиған “хәлқ гезити” ниң хәвиридә ашкарилинишичә, мәзкур һәрикәт башланған 2016‏-йили 10‏-айдин бери уйғур аптоном райони миқясида бир милйон 100 миң һәр дәриҗилик кадир, ишчи-хизмәтчи төвәнгә чүшүрүлүп, бир милйон 600 миң йәрлик аилә билән “туғқанчилиқ” орнитилған. “хәлқ гезити” ниң хәвиридә йәнә қәйт қилинишичә, бир милйон 100 миң кадир вә ишчи-хизмәтчи бу мәзгил ичидә аталмиш йәрлик “туғқанлири” ни 33 милйон 300 миң қетим йоқлап барған. Бу һәр 20 нәччә күндә бир қетим келип “туғқан йоқлаш” қа тоғра келидикән.

Мәзкур һәрикәт чен чүәнго уйғур аптоном райониға йөткәп келинип 2 айдин кейин, йәни кәң көләмлик “йиғивелиш лагерлири” қурулуп, бир милйондин артуқ уйғур бу лагерларға солиништин сәл бурунла башланған. Йеқинда америкиниң хәлқара диний ишлар баш әлчиси сам бровенбәк ақсарайға “йәр шари магнитиский кишилик һоқуқ қануни” ни ишқа селип, чен чүәнгониң уйғур елида елип барған инсанийәткә қарши қилмишлирини җазалашни тәләп қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт