«Қошмақ туғқан болуш» сиясити даириләрниң уйғур елидики әң гәвдилик тәшвиқат темисиға айланмақтикән

Мухбиримиз қутлан
2016-12-05
Елхәт
Пикир
Share
Принт

Чен чүәнго уйғур аптоном райониға партком секретари болуп тәйинләнгәндин буян униң милләтләр иттипақлиқи бойичә «қошмақ туғқан болуш» сиясити кәң көләмдә тәшвиқ қилинмақтикән.

Игилинишичә, уйғур аптоном районлуқ партком, хәлқ һөкүмити, хәлқ қурултийи вә биңтуән баш оргини қатарлиқ органлардики юқири дәриҗилик кадирлар чен чүәнгониң көрсәтмиси бойичә асасий қатламдики башқа милләт кишилири билән «қошмақ туғқан» болушқан.

12-Ай кириши билән уйғур аптоном районидики һөкүмәт таратқулириниң асасий темиси аталмиш «қошмақ туғқанлар» ниң рәңгарәң һекайилири билән толған.

Тәңритағ ториниң бүгүнки баш бетидә уйғур аптоном райониниң рәиси шөһрәт закирниң үрүмчидики «коенлун сарийи» да 300 дин артуқ «қошмақ туғқан» болушқан һәр милләт аилилиригә зияпәт бәргәнлики, уйғур аптоном районлуқ хәлқ қурултийиниң мудири нәйим ясинниң үрүмчидики хәлқ сарийида «қошмақлишип туғқан болғанлар» үчүн көрүшүш йиғини өткүзүп бәргәнлики хәвәр қилинған.

Мәлум болушичә, чен чүәнгониң «қошмақ туғқан болуш» сиясити асаслиқи уйғурлар билән хитайлар арисида вә хитайлар билән башқа милләтләр арисида «туғқанчилиқ риштиси орнитип, бир аилә кишилиридәк инақ өтүш» ни тәшәббус қилидикән. У өзиниң «қошмақ туғқан болуш»сияситини тибәт аптоном районида партком секретари болуп турған мәзгилләрдә йолға қоюп, мәлум нәтиҗә һасил қилған икән.

Көзәткүчиләр, чен чүәнгониң «қошмақ туғқан болуш» сияситиниң тибәттә милләтләр ара қошулуп кетиш муқамини күчәйтиштә рол ойниғанлиқини илгири сүрмәктә. Игилинишичә, нөвәттә уйғурларниң башқа милләтләр билән тойлишиш нисбити хитай бойичә әң төвән болуп, 1 пирсәнткиму йәтмәйдикән. Һалбуки, әң йеңи статистикилиқ мәлуматлар тибәтләрниң башқа милләтләр билән, болупму хитайлар билән тойлишиш нисбитиниң 10 пирсәнткә йәткәнликини илгири сүрмәктә.

Пикирләр (0)
Share
Толуқ бәт