"Qoshmaq tughqan bolush" siyasiti da'irilerning Uyghur élidiki eng gewdilik teshwiqat témisigha aylanmaqtiken

Muxbirimiz qutlan
2016-12-05
Élxet
Pikir
Share
Print

Chén chüen'go Uyghur aptonom rayonigha partkom sékrétari bolup teyinlen'gendin buyan uning milletler ittipaqliqi boyiche "Qoshmaq tughqan bolush" siyasiti keng kölemde teshwiq qilinmaqtiken.

Igilinishiche, Uyghur aptonom rayonluq partkom, xelq hökümiti, xelq qurultiyi we bingtu'en bash orgini qatarliq organlardiki yuqiri derijilik kadirlar chén chüen'goning körsetmisi boyiche asasiy qatlamdiki bashqa millet kishiliri bilen "Qoshmaq tughqan" bolushqan.

12-Ay kirishi bilen Uyghur aptonom rayonidiki hökümet taratqulirining asasiy témisi atalmish "Qoshmaq tughqanlar" ning renggareng hékayiliri bilen tolghan.

Tengritagh torining bügünki bash bétide Uyghur aptonom rayonining re'isi shöhret zakirning ürümchidiki "Ko'énlun sariyi" da 300 din artuq "Qoshmaq tughqan" bolushqan her millet a'ililirige ziyapet bergenliki, Uyghur aptonom rayonluq xelq qurultiyining mudiri neyim yasinning ürümchidiki xelq sariyida "Qoshmaqliship tughqan bolghanlar" üchün körüshüsh yighini ötküzüp bergenliki xewer qilin'ghan.

Melum bolushiche, chén chüen'goning "Qoshmaq tughqan bolush" siyasiti asasliqi Uyghurlar bilen xitaylar arisida we xitaylar bilen bashqa milletler arisida "Tughqanchiliq rishtisi ornitip, bir a'ile kishiliridek inaq ötüsh" ni teshebbus qilidiken. U özining "Qoshmaq tughqan bolush"siyasitini tibet aptonom rayonida partkom sékrétari bolup turghan mezgillerde yolgha qoyup, melum netije hasil qilghan iken.

Közetküchiler, chén chüen'goning "Qoshmaq tughqan bolush" siyasitining tibette milletler ara qoshulup kétish muqamini kücheytishte rol oynighanliqini ilgiri sürmekte. Igilinishiche, nöwette Uyghurlarning bashqa milletler bilen toylishish nisbiti xitay boyiche eng töwen bolup, 1 pirsentkimu yetmeydiken. Halbuki, eng yéngi statistikiliq melumatlar tibetlerning bashqa milletler bilen, bolupmu xitaylar bilen toylishish nisbitining 10 pirsentke yetkenlikini ilgiri sürmekte.

Toluq bet