Қуллуққа қарши туруш хәлқара җәмийити әнгилийә сотида дуня уйғур қурултийини қоллайдиғанлиқини билдүрди

Вашингтондин мухбиримиз җәвлан тәйярлиди
2024.05.08

Икки йил бурун дуня уйғур қурултийи әнгилийә һөкүмитиниң уйғур районидин пахта импорт қилиш мәсилисини тәкшүрмигәнликини билдүргәндә, әнгилийә соти һөкүмәт тәрәптә турувалғаниди. Бу әһвал дуня уйғур қурултийини һәқ-тәләп дәвасидин яндуралмиған болуп, әнгилийә сотиниң қарари үстидин әрз сунмақчи болған.

Қуллуққа қарши туруш хәлқара җәмийити 8-май күни бу тоғрулуқ X һесабида елан қилған учурда, “келәр һәптә дуня уйғур қурултийи әнгилийә һөкүмити билән қайта йүзлишиду. Бу қетимқиси сотқа әрз қилиштур. Күчлүк тәрәпкә тақабил туруш мушәққәтлик иштур, шуңа улар сотниң биринчи күнидики гуваһлиқ бериш йиғиниға қатнашқанда, сиз улар билән бир сәптә икәнликиңизни көрситәләмсиз?” дейилгән.

Қуллуққа қарши туруш хәлқара җәмийити йәнә X дә билдүргән ипадисидә, “биз бу сотта нурғун кишиләрниң дуня уйғур қурултийини қоллайдиғанлиқини, улар билән бир сәптә туридиғанлиқини көрситимиз. Биз у йәрдә мәҗбурий әмгәктә һәргиз адиллиқ болмайдиғанлиқини ениқ җакарлаймиз” дейилгән.

Қуллуққа қарши туруш хәлқара җәмийити 1839-йил әнгилийә вә чәт әлдики қуллуққа қарши туруш җәмийәтлири бирлишип қурған хәлқаралиқ җәмийәт болуп, тарихи әң узун һөкүмәтсиз тәшкилат һесаблинидикән. Баш шитаби әнгилийәгә җайлашқан бу тәшкилатниң вәзиписи дуняниң һәр қандақ йеридики қуллуқ түзүмгә қарши туруш, адәмләрни һәр хил шәкилдә қул қилиш, мәҗбурий әмгәккә селиш, хорлаш җинайәтлирини тохтитиш икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.