Qulluqqa qarshi turush xelq'ara jem'iyiti en'giliye sotida dunya Uyghur qurultiyini qollaydighanliqini bildürdi

Washin'gtondin muxbirimiz jewlan teyyarlidi
2024.05.08

Ikki yil burun dunya Uyghur qurultiyi en'giliye hökümitining Uyghur rayonidin paxta import qilish mesilisini tekshürmigenlikini bildürgende, en'giliye soti hökümet terepte turuwalghanidi. Bu ehwal dunya Uyghur qurultiyini heq-telep dewasidin yanduralmighan bolup, en'giliye sotining qarari üstidin erz sunmaqchi bolghan.

Qulluqqa qarshi turush xelq'ara jem'iyiti 8-may küni bu toghruluq X hésabida élan qilghan uchurda, “Kéler hepte dunya Uyghur qurultiyi en'giliye hökümiti bilen qayta yüzlishidu. Bu qétimqisi sotqa erz qilishtur. Küchlük terepke taqabil turush musheqqetlik ishtur, shunga ular sotning birinchi künidiki guwahliq bérish yighinigha qatnashqanda, siz ular bilen bir septe ikenlikingizni körsitelemsiz?” déyilgen.

Qulluqqa qarshi turush xelq'ara jem'iyiti yene X de bildürgen ipadiside, “Biz bu sotta nurghun kishilerning dunya Uyghur qurultiyini qollaydighanliqini, ular bilen bir septe turidighanliqini körsitimiz. Biz u yerde mejburiy emgekte hergiz adilliq bolmaydighanliqini éniq jakarlaymiz” déyilgen.

Qulluqqa qarshi turush xelq'ara jem'iyiti 1839-yil en'giliye we chet eldiki qulluqqa qarshi turush jem'iyetliri birliship qurghan xelq'araliq jem'iyet bolup, tarixi eng uzun hökümetsiz teshkilat hésablinidiken. Bash shitabi en'giliyege jaylashqan bu teshkilatning wezipisi dunyaning her qandaq yéridiki qulluq tüzümge qarshi turush, ademlerni her xil shekilde qul qilish, mejburiy emgekke sélish, xorlash jinayetlirini toxtitish iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.