Da'iriler Uyghur élida yene 5 jayning qumlashqan rayon tizimlikige kirgenlikini ashkarilidi

Muxbirimiz méhriban
2016-04-05
Élxet
Pikir
Share
Print

Da'iriler Uyghur aptonom rayonidiki borchin, mori, lop, yéngisar, baghrash qatarliq besh nahiyining nuqtiliq halda qumni tizginlesh pilanigha kirgüzülgenlikini élan qildi.

Xitayning tengritagh torining 5-aprél seyshenbe künidiki xewiride déyilishiche, yéngidin qoshulghan bu besh nahiyini qoshqanda hazirgha qeder 17 nahiye, sheher qumni tizginlesh pilanigha kirgüzülgen, xewerde bu rayonlarning igiligen kölimi 3 milyon 625 ming mo ikenliki bayan qilin'ghan. Xewerde yene, xitay hökümet da'irilirining 2013 yildin bashlap qumlishishni tizginlesh pilanini yolgha qoyghanliqi, shu yili shayar, qaraqash, pichan, qumul, manas qatarliq 6 rayonda sinaq teriqiside qumni tizginlesh bashlan'ghanliqi, 2015-yili yene jimisar, awat, yopurgha, jiminey, chira, chaqiliq qatarliq nahiyelerning qumlishish-chöllishishni tizginlesh pilanigha kirgüzülgenliki tilgha élin'ghan.

Matériyallardin melum bolushiche, Uyghur élidiki bostanliqlarning qumlishish-chöllishish ehwali ötken esirning 70 yilliridin kéyin barghanche kücheygen. Xitay hökümet da'iriliri qumlishish we chöllishishning su qisliqi sewebidin bolghanliqini étirap qilghan bolsimu, emma ijtima'iy sewebliri heqqide toxtilishtin özini qachurup kelgen.

Mutexessisler rayondiki chöllishish we qumlishishning muhim seweblirining biri, izchil élip bérilghan atom bombisi sinaqliridin bashqa yene, ishlepchiqirish qurulush armiyisining eslidiki su menbelirining bash qismini boghuwélishi, bolupmu 2000-yillardin kéyin rayonda échiliwatqan néfit-kömür, altun qatarliq yer asti bayliqlirigha ziyade köp su serp qilghanliqi ikenliki, shu sewebtin teklimakan boyidiki bostanliqlarning chöllishiwatqanliqi we jungghar oymanliqi etrapidiki yaylaqlarning ot-chöp ünmeydighan ehwallargha duchar boluwatqanliqi tekitlimekte.

Toluq bet