Қурбан һейт мунасивити билән дуня мусулманлири уйғурларға дуа қилишқа чақирилди

Мухбиримиз әзиз
2019-08-13
Елхәт
Пикир
Share
Принт

Хитай һөкүмитиниң уйғурларни бастуруш һәрикитигә қарита ислам дунясиниң сүкүт қилипла қалмастин, йәнә хитай һөкүмитиниң бу хил һәқсизлиқлирини қоллайдиғанлиқини билдүрүп баянат елан қилиши йеқиндин буян бу һәқтики көплигән кәскин язмиларниң оттуриға чиқишиға сәвәб болуватқанлиқи мәлум. Америкадики даңлиқ тор язғучилиридин с. Җ. Верлемән бу мунасивәт билән «түркийә радийо телевизийәси дуняси» да елан қилған бу һәқтики мақалини әнә шу хил чуқанларниң бири, дейишкә болиду.

Аптор мақалисидә нуқтилиқ қилип нөвәттә дуняниң уйғурлар мәсилисидә үч қутупқа айриливатқанлиқини, бир қутуптикиләрниң хитай иҗра қиливатқан бу хил бастурушларни қаттиқ әйибләватқанлиқи, иккинчи қутуптикиләрниң бу хил бастурушларни қоллаватқанлиқини, үчинчи қутуптикиләрниң болса бу һалға қарита сүкүтни талливалғанлиқини баян қилиду.

Болупму 22 ғәрб дөлити б д т ға бу мәсилә һәққидә очуқ хәт йоллап өз наразилиқини билдүргәндин кейин, хитай һөкүмити 72 саәт ичидә тездин 37 дөләтни һәрикәткә кәлтүрүп буниңға қарши очуқ баянатни тәйярлап чиққан. Бу баянатта «тақәт қилип турғусиз террорлуқ вә әсәбийликниң хирислириға дуч кәлгән хитай һөкүмити илаҗсиз шинҗаң районида мушу хилдики террорлуққа вә әсәбийликкә қарши тәдбирләрни иҗра қилишқа, шу қатарда кәспий тәрбийәләш мәктәплирини ечишқа мәҗбур болмақта» дегән қурлар орун алған.

Аптор хитай һөкүмитини қоллаш мәзмунидики бу баянатқа имза қойғанлар ичидә сәуди әрәбистани, әрәб бирләшмә хәлипилики, қатар, бәһрәйн, кувәйт, сүрийә қатарлиқ ислам дөләтлириниң барлиқини баян қилиш арқилиқ нөвәттә хитай һөкүмитиниң уйғурлар диярида йүзлигән мәсчитләрни чеқип ташлиғанлиқи вә ислам динидики әң әқәллий ибадәт шәкиллирини аммиви сорунлар үчүн «қанунсизлиқ» дәп бекиткәнликини баян қилип: «мана мушу террорлуққа қарши тәдбирләрму?» дәп соал қойиду.

Аптор йәнә һазир көпләп мәлум болуватқан исламий бәлгиләрни вә әрәбчә хәтләрни мәни қилиш қилмишиниң маһийәттә милйонлиған кишини лагерға қамаш, қамақтикиләрни җисманий җәһәттин қийнаш, уйғур қиз-аяллирини хитайларға тегишкә мәҗбурлаш, уйғур сәбилирини хитайларниң беқивелишиға бериветиш қатарлиқ «мәдәнийәт қирғинчилиқи» ға даир һадисиләрниң кичиккинә бир парчисини әкс әттүридиғанлиқини, мушундақ еғир паҗиәләрниңму пәләстингә охшаш бир һакимийәтниң бу баянатқа имза қоюшини тосуп қалалмиғанлиқини аччиқ кинайә ичидә баян қилиду.

Аптор ислам әллириниң хитай һөкүмити тәкитләватқан «ислам дини террорлуқ билән зич бағлинишлиқ» дегән қарашларни қоллап-қуввәтлиши һәмдә сәуди әрәбистанниң тәхт вариси муһәммәд бин салманниң хитай һөкүмити иҗра қиливатқан «террорлуқ вә әсәбийликкә қарши туруш» тәдбирлирини алқишлиши һәққидә тохтилип: «мушундақ әһвалда мусулманларни әйибләп келиватқан оңчилар ‹қараңлар, сәуди әрәбистанниң вәлиәһдиси чеғида ислам динини терроризмға апиридиған йол деди' дәп җакалимамду?» дәйду.

Аптор мушу әһвалларни омумлаштуруп: «бу йиллиқ һәҗ үчүн мәккигә йол алған барлиқ һаҗилар уйғурларға, уйғурларға қаритилған бу хилдики пәрвасизлиқниң тездин аяғлишишиға дуа қилиши лазим» дәп көрситиду.

Пикирләр (0)
Share
Толуқ бәт