Уйғур мәҗбурий әмгики америкадики қуяш енергийәси җәмийәтлирини тәдбир елишқа мәҗбур қилди

Хитайниң уйғурларни кәң көләмлик мәҗбурий әмгәккә селиши америкадики қуяш енергийә тахтиси җәмийәтлирини тәдбир елишқа мәҗбур қилған. Мәлум болушичә, америка қуяш енергийә тахтиси җәмийити өткән һәптә қуяш енергийәси тахтиси материяллириниң келиш мәнбәси вә пүткүл тәминат зәнҗирини из қоғлап назарәт қилидиған бир тәдбирни йолға қойған.

Америкадики “тәминат зәнҗири” намлиқ сода ториниң хәвәр қилишичә, “қуяш енергийә тахтилириниң тәминат зәнҗирини из қоғлаш түзүми” намлиқ бу тәдбир мәхсус уйғур илидики кишилик һоқуқ дәпсәндичиликигә қаритилған икән.

Хәвәрдә, униң уйғур елидә ишләпчиқирилип америкиға импорт қилинидиған қуяш енергийә тахтилириға мәҗбурий әмгәк арилишип қелишиниң алдини елиш мәқсәт қилинғанлиқи билдүрүлгән. Хитай дунядики әң чоң қуяш енергийә тахтиси ишләпчиқарғучи дөләт болуп, уйғур ели униң асаслиқ материял базиси. Илгири хәлқара тәтқиқат орунлири вә таратқулири уйғурларниң райондики қуяш енергийәси тахтиси карханилирида мәҗбурий әмгәккә селинидиғанлиқини ашкарилиған.

Лекин хәвәрдә ейтилишичә, германийәлик базар анализчиси җоһаннис бернруйтер, әң яхши чарә тәминат мәнбәсини хитайдин башқа җайға йөткәш икәнлики, бирақ буниң қисқа вақитта әмәлгә ешиши қийинлиқи, из қоғлашниң қисқа муддәт ичидики бирдин бир чарә икәнликини билдүргән.