Uyghur mejburiy emgiki amérikadiki quyash énérgiyesi jem'iyetlirini tedbir élishqa mejbur qildi

Xitayning Uyghurlarni keng kölemlik mejburiy emgekke sélishi amérikadiki quyash énérgiye taxtisi jem'iyetlirini tedbir élishqa mejbur qilghan. Melum bolushiche, amérika quyash énérgiye taxtisi jem'iyiti ötken hepte quyash énérgiyesi taxtisi matériyallirining kélish menbesi we pütkül teminat zenjirini iz qoghlap nazaret qilidighan bir tedbirni yolgha qoyghan.

Amérikadiki “Teminat zenjiri” namliq soda torining xewer qilishiche, “Quyash énérgiye taxtilirining teminat zenjirini iz qoghlash tüzümi” namliq bu tedbir mexsus Uyghur ilidiki kishilik hoquq depsendichilikige qaritilghan iken.

Xewerde, uning Uyghur élide ishlepchiqirilip amérikigha import qilinidighan quyash énérgiye taxtilirigha mejburiy emgek ariliship qélishining aldini élish meqset qilin'ghanliqi bildürülgen. Xitay dunyadiki eng chong quyash énérgiye taxtisi ishlepchiqarghuchi dölet bolup, Uyghur éli uning asasliq matériyal bazisi. Ilgiri xelq'ara tetqiqat orunliri we taratquliri Uyghurlarning rayondiki quyash énérgiyesi taxtisi karxanilirida mejburiy emgekke sélinidighanliqini ashkarilighan.

Lékin xewerde éytilishiche, gérmaniyelik bazar analizchisi johannis bérnruytér, eng yaxshi chare teminat menbesini xitaydin bashqa jaygha yötkesh ikenliki, biraq buning qisqa waqitta emelge éshishi qiyinliqi, iz qoghlashning qisqa muddet ichidiki birdin bir chare ikenlikini bildürgen.